Adenan minta ngiring nengeri tu lima taun agi

0

ENGGI NUAN: Adenan (lima kanan) nyuaka trofi Golf Amatur Malaysia (MGA) Ke-11 ngagai Marc di Kelab Golf Sarawak Petra Jaya kemari. Bela dipeda Mohd Anwar (enam kanan).

Iya pechaya deka mai mayuh agi ubah ba pemansang ungkup pengelantang semua peranak Sarawak

Dikarang Chris Bishop //

KUCHING: Kepala Menteri Datuk Patinggi Tan Sri Adenan Satem netap peranak Sarawak deka ngasai mayuh agi pengelantang jemah ila nengah tusun perintah iya.

Bejaku ba pengerami nutup Pekit Golf Amatur Malaysia (MGA) ti Ke-11 di Kelab Golf Sarawak Petra Jaya ditu kemari, Adenan sekali agi minta rayat meri iya peluang ngiring nengeri tu.

“Pagi tu tadi aku udah bejadika pengawa nginsil bayar tol ba Jematan Lanang Sibu, beribu mensia datai.

“Aku mega udah netapka, nadai bayar tol dipinta ba Jematan Asean ti nyambung Miri enggau Brunei. Kelimpah ari nya kitai mega udah ngurangka tarif lekterik di nengeri tu.

“Servis feri ke bisi di nengeri tu semina deka minta bayar RM1 aja lalu semua nya ungkup pemaik peranak Sarawak sereta dipejalai dalam timpuh setaun tu,” ku iya.

Beri aku timpuh 5 taun agi, nama runding bala mayuh sentang pemansang tauka pengelantang bukai ke deka dibai aku, tandu iya.

Berengkah sehari tu (25 Mei 2015) mensia mayuh ke bebai perengka pengangkut nengah Jematan Lanang, Sibu enda dipinta mayar tol agi.

Ba Pekit Golf Amatur Malaysia ke-11 ti tembu kemari, Marc Ong Chong Ching ari Singapore teulihka gelar champian.

Marc ,19, ngalahka 126 iku pemain bukai ti ngarika 14 bengkah menua nengah penyampau 275 palu.

Penuduk lumur dua pulai ngagai Harrison Endycott ari Sydney Australia nengah penyampau 280 palu lalu penuduk lumur tiga pulai ngagai Justin Warren ari Australia (283).

Perais disua Adenan ke mega Presiden Kelab Golf Sarawak.

Bela bisi ngulu atur pengawa nya, Presiden MGA Senator Tan Sri Mohd Anwar Mohd Nor.