KAPIT: Pemesai kanan Opis Menteri Pemansang Menua Pesisir enggau Kandang Nengeri (KKLW) Kapit sereta Sapit Menteri iya, Datuk Alexander Nanta Linggi udah nguluka pengawa bejalai ngabas sereta meresa endur mayuh bengkah projek pemansang di baruh opis menteri iya di pasar Kapit.
Gaya hari ke beberis maya nya enda ngemuntanka pejalai Nanta sereta raban Pemesai Kanan ari KKLW enggau ejensi FELCRA sereta GiatMara ke udah berujan ngelawa meresa endur nya.
Endur keterubah dilawa sida iya nya Palan Penyangkai Perau Panjai Kapit ti udah tembu digaga taun seiti kemari ngena belanja RM5 juta.
Servis perau panjai nya sebengkah palan ti beguna bendar nyadi jalai penyambung peranak di menua pesisir nebing Batang Rajang sereta alai sida bejalaika pengawa bebelika perengkaguna enggau pemakai sereta fasiliti bukai ba penyangkai perau panjai tu nyamin pengelikun perau sida.
Palan kedua dilawa sida iya nya balai mensia mayuh ke baru udah tembu digaga, Balai Kampung Melayu Kapit di Kampung Muhibbah Jalai Bleteh ke udah digaga ngena belanja RM2 juta.
Berebak enggay nya pejalai meresa ke penudi ngagai jematan gantung ke udah tembu digaga meraka Sungai Kapit ke nyadi jalai mintas ari Kampung Baru ngagai Kampung Muhibbah enggau Komplek Opis Menua di Jalai Bleteh.
Jematan gantung ti ngembuan pemanjai 100 meter ulih ditengah bejalai kaki tauka ngena motosikal nyambung pejalai ngagai Kampung Baru enggau Kampung Muhibbah Bleteh.
Bela bisi ngulu atur pengawa tu, Sapit Residen Kapit (Pemansang Sosial) Zul Bin Haji Usup, Pemesai Pelilih Mit Kapit Elvis Didit, Pemesai Pelilih Mit Song Jackline Bte August, Temenggong Tan Kian Ho, Pemanca Haji Wasli Noor, Pemanca Yong Thu Fook, ketuai ari mayuh bengkah ejensi perintah, ketuai komiti enggau sekeda raban kaunsilor Opis Kaunsil Pelilih Mit Kapit.