SIMUNJAN: Operasyen ‘Ops Sawit Kenyalang’ ke diperengkahka Malaysian Palm Oil Board (MPOB) bulan Julai nyin tadi mujur dipejalai lalu udah ngeluarka 800 lisin baru ninting bulan ngagai orang bekebun mit di serata nengeri.
Ketuai MPOB Sarawak Sulim Lumong madah penyampau 800 lisin baru dikeluar ninting bulan asil ari operasyen ke dipejalai lalu penyampau nya nambah 600 ari ngelamatu.
“Ba bulan April taun tu, kitai ngemendarka 1,414 lisin dikeluar. Naka diatu kitai udah ngeluarka 23,000 lisin ngagai pekebun mit lalu nya mungkur tanah pemesai 140,188 hektar di serata Sarawak,” ku iya madah ngagai pemberita di kebun sawit Kpg Sg Alit ditu, kemari.
Sulim madah penyampau nya nambah pengudah perintah ngepunka polisi 2 tan sehektar.
“Mayuh pekebun mit enda minta lisin ketegal sida ngasai ulih ngena lisin nyual enggi orang bukai. Pengudah kitai ngepunka polisi sida enda ulih nyual agi, sida nadai pilih bukai ..enggai nyadi enda minta lisin,” ku iya nambah.
Iya mega madah pekebun enda dipinta ngerijista maya sida ngepunka pengawa nanam sawit tang lisin pekebun mit diatu diguna sebedau sida ulih nyual buah sawit.
Pekebun mit mungkur orang ti numbuhka kebun pemesai urung 100 ekar tauka 40.46 hektar tauka mit agi ari tu. Pekebun ke numbuhka sawit ba tanah ngelui ari 100 ekar dikumbai pekebun dandang besai.
“Tu meh tuju Ops Sawit Kenyalang, kitai enda meresa kebun dandang besai. Ungkup pekebun mit, sida enda dipinta mayar maya minta lisin.
Dulu agi ari tu, Menteri Kebun Dandang Besai enggau Komoditi Datuk Amar Douglas Uggah Embas ngaku sekeda pekebun mit di nengeri tu nadai ngembuan lisin.
“Taja pia aku enda ulih nyalahka sida, engka MPOB enda nerangka enggau silik ngagai sida ngelamatu. Ngarap nengah Ops Sawit Kenyalang kitai ulih mutarka semua penanggul sereta ngelengkaska pinta,” ku Uggah.
Uggah nambah MPOB dipinta ngelengkas proses ngeluarka lisin dalam timpuh seminggu aja.