Ngena awak ngajar di nengeri tu, pengajar semenanjung patut mereti seraya belajarka pengidup peranak Sarawak
Dikarang Judan Bungap //
SIBU: Pengajar ari Semenanjung Malaysia ke ngajar di menua pesisir nengeri tu tau ngena awak nya ngasaika pengidup begulai enggau orang ke ngempu menua nambahka penemu baru.
Menteri ba Opis Menteri Besai, Datuk Joseph Entulu Belaun madah, sida tau bekunsika peneleba senentang bida pengidup rayat Sarawak enggau Semenanjung Malaysia enti sida mulaika diri ke menua.
“Chara tu tau dikena kitai besaup nyintalka kaul enggau integriti antara rayat Semenanjung Malaysia enggau rayat di Sarawak lalu pia mega di Sabah.
“Kedung kita ngajar ditu lebih agi ba menua pesisir baka di Kapit tauka Belaga, anang enda belajar, kelala enggau semak chara pengidup sereta main asal rayat menua tu,” ku iya lebuh bejadika Pengerami Hari Pengajar renggat pelilih mit Selangau di Sibu ditu, malam kilah ensana.
Bela bisi datai maya nya, Pemesai Opis Pelajar Pelilih Selangau Jambai Sayong.
Nambahka nya, ku Entulu, enti agi dulu suba, urung taun 70 nyentuk 80, orang ba nengeri tu alit ati maya ninga jaku orang Semenanjung lebuh datai ke Sarawak.
“Tang diatu mayuh kitai ba nengeri tu nyauka sebaka munyi jaku enggau sida ari Semenanjung Malaysia.
“Aku enda nemu ulih ke enda sida ari Semenanjung Malaysia nitihka munyi jaku Melayu Sarawak.
“Tang enti ulih tu mandangka bisi integrasi nyadi antara nengeri tu enggau Semenanjung,” ku iya madah.
Berebak enggau tu iya ti mega Kaban Parlimen Selangau madah, perintah udah mayuh nangkir sereta ngemanahka macham bengkah pekara bekaul enggau pemansang pelajar.
Tang taja pan baka nya ku iya, empai bisi pemujur ulih dipeda ari pengeransing nya ti tau dikemegahka.
“Nya alai, kitai patut meda perkara tu lalu randaka pengeransing semua bala pengajar ulih meri timbal ke manah ngagai pengeransing perintah nyungkakka tikas pemansang pelajar ba nengeri tu.
“Ambika banding, kita (pengajar) ulih tetitihka pemujur ke dikembuan SK Ulu Lubai di Limbang?,” tanya iya.
Kelimpah ari nya, Entulu mega madah, tiap bengkah sekula sekondari enggau primari di pelilih Selangau nerima geran RM10,000 enggau 5,000 nyengkaum Opis Kepala Pengajar Selangau bela nerima geran RM10,000.
Ba pengerami tu, Kaban Kunsil Nengeri Tamin Datuk Joseph Mauh Ikeh nerima gelar ‘Anugerah Tokoh Kepimpinan Pendidikan Daerah Selangau Tahun 2015’.
Mauh, 64, kala nyadi pengajar sebedau nguing ngagai politik ba taun 1990 nyentuk diatu.