KUCHING: Berengkah ari pukul 12.00 pagi pagila (Hari Lima) semua servis feri di pinta nyemaka ke penyampau bayar tambang, iya nya RM1 ungkup kerita lalu RM5 ( bas tauka lori), di serata nengeri tu.
Menteri Pemansang Infrastruktur enggau Penyambung Dato Sri Michael Manyin Jawong madah, atur nya mungkur dua feri ti dipejalaika operator peribit iya nya di Long Lama enggau Marudi.
Iya madah munyi tu ba sebengkah aum pengarang berita ti diatur ba Indu Opis DBNA, Jalai Kumpang ditu pagi kemari. Kededua feri ti dipejalaika operator peribit beberapa taun ke udah, bisi minta tambang ti besai ari mensia mayuh iya nya RM3 ngagai RM5 sereta bisi nyentuk ngagai RM115 tauka lebih ungkup treler.
“Bisi dua buah servis feri ti bedau diberi sabsidi ari perintah iya nya ba long Lama enggau Marudi.
“Kami bisi nerima mayuh peminta, ukai sebana tang peminta ngambika kededua buah servis feri nya ulih dipejalaika sebaka enggau servis 12 buah feri bukai ti bisi bulih sabsidi ari perintah.
“Nya alai berengkah ari pukul 12 pagi 29 Mei tu (pagila), semua kitai semina mayar RM1 aja ke sebuah kerita lalu RM5 ke sebuah bas tauka lori, semua servis tauka bayar tu sebaka ba 12 buah feri nyengkaum dua buah feri nya,” ku iya seraya madahka Sarawak bisi 14 buah feri (ti nyengkaum dua buah ti dipejalaika operator peribit).
Bekaul enggau dua buah feri nya, iya madahka pengawa bejadika feri ba Long Lama deka dipenyadika (ADUN Telang Usan) YB Dennis Ngau lalu di Marudi dipenyadika (Menteri Muda Perengka Guna Mensia Mayuh) Datuk Sylvester Entri.
Nambahka nya lebuh ti ngenang pasal Sistem Bas Mensia Mayuh, Manyin madahka pekara nya kala dikenang iya ngagai mensia mayuh sereta Kunsil Nengeri, ke alai bandaraya Kuching udah dikemendar bejalaika servis bas besabsidi.
Pekara nya udah dikerandauka enggau kompeni bas sereta Suruhanjaya Perkhidmatan Awam Darat (SPAD) di Kuala Lumpur, lalu sida dipinta nyendiaka tauka ngena bas baru ti kurang ari tujuh taun sereta patut numbuhka konsortium, ku iya.
Bisi lima buah kompeni bas ti nyengkaum Bau Transport Company Sdn Bhd, Biramas Express Sdn Bhd, City Public Link Bus Services Sdn Bhd, Petra Jaya Transport (Sarawak) Sdn Bhd enggau Sarawak Transport Co. Bhd.
“Pengudah sempekat nya disain sida nganti bas (baru), sida (konsortium) udah ngudar 140 buah bas baru. Bas nya patut disikap enggau perengka ngelatangka penumpang OKU sereta disikap ngena mesin tikit elektronik.
“Jalai ti deka ditengah iya nya 26 iti batang jalai, 14 iti jalai besai,12 iti jalai mit sereta pemanjai semua jalai nya bisi 512.6 kilometer. Tu penambah 68 peratus jalai ba Kuching aja,” ku iya madahka dalam timpuh lima taun ke deka datai dipelabaka manggai 50,000 ngagai 75,000 iku orang bekenaka bas.
Ngenang pasal langgur penemu Wong (ADUN Padungan), Manyin madahka tuju penemu iya manah laban minta nyendiaka servis enda bebayar di Kuching, tang laban menua majak mansang, perintah enda ulih nanggung ungkus ti dipelabaka urung RM145 juta sereta ungkus operasyen ninting taun urung RM48 juta.
“Langgur penemu iya manah tang bedau ulih dipejalaika ke diatu. Kitai nadai chukup pemisi.
“Ba semua menua ti benung mansang, nadai servis ti enda bebayar. Sarawak benung mansang kitai bedau bisi duit. Enti ulih kami deka meri semua orang servis enda bebayar, enda ulih ba sebengkah endur aja, kati gaya di Sibu, Miri, Bintulu, Sarikei enggau menua pesisir( tentu deka sama).
“Ke bendar sida ba menua pesisir ti amat begunaka servis enda bebayar laban sida seranta agi ari orang di pasar. Kitai enda ulih semina ngatur penanggul sekut jalai di mengeri laban menua pesisir bisi orang seranta ti amat begunaka duit bantu tauka servis enda bebayar,” ku iya.