Legit pengerami mandangka Adat enggau Main Asal Dayak nya diatur SDGA, DNC begulai kena 20 Jun tu
Dikarang Rengenyan Labang //
ORANG KUAT: Jimmy (tiga ari kanan) enggau Hazelina (tiga ari kiba) begambar bebala mayuh enggau kaban komiti festival.
KUCHING: Serakup Graduate Dayak Sarawak (SDGA) enggau Kongres Nasional Dayak (DNC) deka begulai ngatur Festival Adat enggau Main Asal Dayak kena 19 ngagai 21 Jun tu.
Chairman Pengatur Begulai Jimmy Donald (DNC) enggau Hazelina Samuel (SDGA) madah, festival nya deka diatur ba Indu Opis DBNA, Jalai Kumpang ditu.
Nitih penemu seduai, rambai jaku festival nya ‘One Borneo One Dayak’.
“Legit festival tu iya nya malam 20 Jun ti disadang dipenyadika Menteri Pemansang Rama Tan Sri William Mawan Ikom sereta dipelabaka digulu raban pemesai bansa Dayak ari Kalimantan, Sabah enggau Brunei kelimpah ari pemesai ari nengeri tu.
“Pengerami ke diatur tu nadai kaul enggau pekara politik, nya alai kitai ngangauka semua kaban parti politik tauka YB Dayak, enda ngira sekalika ari perintah tauka penyakal datai ngulu festival tu.
“Tambah mega tuju kitai ngatur festival tu endang dikena ngenegapka pengangkun bansa Dayak ngerami Gawai seraya ngayanka adat enggau main asal Dayak Borneo,” ku Jimmy dalam aum pengarang berita ti diatur ba opis SDGA ditu, lemai kemari.
Nitih penerang ari Hazelina, festival nya deka nerima penatai 40 iku kaban NGO Dayak ari Kalimatan enggau 20 ari Sabah, ti udah netapka penatai sida.
Entara atur tauka aktiviti ti dipejalaika tiga hari berunggu, baka bansal pemandang, pekit tatoo, pekit Burung Kenyalang Crafting, makai malam, ngayanka tanda asal, beperindang enggau raban penyanyi enggau ke bukai.
Karnival nya berengkah pukul 8.00 pagi nyentuk 5.00 lemai lalu pengerami makai malam (20 Jun) diatur berengkah ari pukul 6.00 lemai nyentuk 12.00 tengah malam.