Hari Nembiak 2015 renggat nengeri deka diatur di Bintulu kena 13 Jun tu

0

KUCHING: Berebak enggau Hari Nembiak kena 13 Jun 2015 tu ila, Kepala Menteri Datuk Patinggi Tan Sri Adenan Satem deka begulai berandau enggau beratus iku nembiak ari serata nengeri tu.

Menteri Pemansang Rama Tan Sri William Mawan Ikom madah, sekali tu, Hari Nembiak Renggat Nenger Sarawak deka diatur lain ari selama, laban Kepala Menteri empu deka berandau enggau bala nembiak ba sebengkah pengawa ke dikumbai ‘Town Hall’.

“Sekali tu Hari Nembiak deka disambut lain ari selama, kitai ngatur pengawa di Bintulu.

“Pengerami sekali tu meri peluang ngagai bala nembiak madah peneka sida iya, ngagai Kepala Menteri, lalu ukai perintah ngeletak utai ke patut dikereja sida. Nyangka nya program, pemerindang, lumba enggau main sereta pemerat bukai ke dikerinduka sida, perintah besedia mendingka nembiak lalu ngemeratka peminta sida,” ku Mawan.

Iya madah munyi nya pengudah betemu enggau Kepala Menteri bekaul enggau program Hari Nembiak 2015 tu ila di Dewan Suarah Bintulu ke alai Kepala Menteri empu deka bejadika pengawa nya.

Program Hari Nembiak deka diatur di Limbang nyentuk ke Kuching.

Maya randau ‘Town Hall’ nya ila, Kepala Menteri empu deka nyaut sekeda tanya sereta pekara ke bisi dalam hati nembiak, lalu Kepala Menteri empu deka ngatur sesi ‘Tanya enggau Saut’.

Hari Nembiak Renggat Nengeri deka betuaika Chairman Pengatur Hari Nembiak 2015 ti mega Menteri Muda Pemansang Nembiak (Menua Pesisir) enggau ADUN Kemena, Bintulu, Datuk Dr. Stephen Rundi deka beratika pemesai Politik mega sama ngulu pengawa nya.

“Mensia mayuh mega dipinta ngulu atur pengawa nya, ukai semina kaban komponen BN aja tang ungkup semua rayat.

“Kami ngarapka bala nembiak deka sampal datai nguluka atur pengawa tu, lalu bala nembiak ke enda kala enggau hari besai ke nembiak tu, aram…sama enggau ngerami Hari Nembiak 2015 laban mayuh utai ke baru deka dipandangka, deka dipadah. Aku pechaya semua pengawa tu ila meri penguntung ngagai nembiak kitai,” ku Mawan.

Sama bisi ngulu atur pengawa nya kemari, Menteri Muda Pemansang Nembiak (Nengeri) Datuk Abdul Karim Rahman Hamzah.