MERESA: Hamidah (kiba), Abdul Aziz enggau raba penerit adat KPDNKK bejalaika pengawa meresa di Pasar Tamu Limbang kemari.
LIMBANG: Opis Menteri Dagang Dalam Nengeri Koperasi enggau Bebeli Barang (KPDNKK) ditu udah netapka rega maksimum borong enggau runchit ungkup 13 bansa barang ti dikemata ari baruh Skim Nyaga Rega Barang Musin Pengerami Gawai 2015 ungkup pelilih mit Limbang enggau Lawas belabuh ari kemari.
Pengari Ketuai Pampang KPDNKK Limbang Abdul Aziz Hassan madah, Skim Nyaga Rega Barang Nyerumba Musin Pengerami (SKHMP) ngelama sepuluh hari nya belabuh ari 24 Mei nyentuk 2 Jun.
Ku iya, rega ti dijaga iya nya manuk idup (RM8.70 sekilogram), manuk standard (RM12.00 sekilogram), manuk super (RM12.50 sekilogram) enggau manuk tuai idup (RM8.70 sekilogram).
“Rega barang bukai nyengkaum sayap manuk (RM12), telu manuk gred A (0.41 sen seigi), gred B (0.40 sen seigi), gred C (0.39 sen seigi), kobis segala import (RM4), bawang mirah (RM7), bawang burak (RM6.50), dagin babi (perut – RM20 sekilogram) enggau dagin babi (dagin enggau lemak – RM18 sekilogram),” ku iya lebuh bejadika nya di Pasar Tamu Limbang kemari.
Bela bisi datai Sapit Residen Bagi Menua Limbang, Hamidah Halpi.
Ku Abdul Aziz, tetiap iku pedagang enda tau enda nyual barang ti ditetap nya enda ngelui ari rega maksimum lalu ngengkahka tanda rega bechura kalas dikena mida barang rega ti dijaga enggau barang bukai.
Ku iya, SKHMP beserimbai Gawai dipenyadi tumu agi dikena nyekat peniki rega barang ti diguna maya mensia mayuh bebelika barang dikena nyendiaka diri ngintu pengerami nya.
Ku iya KPDNKK enda bebatak asur enggau pedagang ti enda nitihka atur ti ditetap serta deka diukum enti ditemu raban penerit adat ti bejalaika suah pengawa mantau ba kandang tamu enggau premis dagang dia.