KUCHING: Menteri Besai Datuk Seri Najib Tun Razak disadang nyadi pengabang ti dipebasa seraya bejadika pengerami Gawai Dayak 2015 renggat nasional kena 3 Jun tu ba Indu Opis DBNA, Jalan Kumpang ditu.
Menteri Pemansang Infrastruktur enggau Penyambung Dato Sri Michael Manyin Jawong madah, pengerami Gawai Dayak nya mega deka digulu Kepala Menteri Datuk Patinggi Tan Sri Adenan Satem.
Gawai Dayak taun tu milih Bidayuh nyadi Tuai Rumah, taun ke udah Iban enggau Orang Ulu udah nyadi Tuai Rumah, ku iya.
“Pengabang ti datai ba pengerami Gawai Dayak 2015 ti diatur 3 Jun ba Indu Opis DBNA iya nya Menteri Besai Datuk Seri Najib Tun Razak, nambahka nya Kepala Menteri kitai Datuk Patinggi Tan Sri Adenan Satem mega deka datai.
“Ditu kami ngelaluka penatai mensia mayuh enda ngira bansa sama ngerami Gawai Dayak 2015. Kami melabaka lebih ari 3,000 iku pengabang ngemenuhka laman DBNA nya ila.
“Baka pengerami Hari Raya Puasa, Taun Baru China sereta Krismas, di Sarawak pengerami Gawai Dayak mega diintu semua enda ngira bansa, ukai semina dikerami sesebengkah bansa aja,” ku iya.
Manyin ke mega chairman komiti Gawai Dayak 2015 mansutka pekara nya dalam aum pengarang berita ke diatur ba Indu Opis DBNA, Jalan Kumpang ditu, kemari.
Rambai jaku Gawai Dayak 2015 iya nya ‘Besindi Besama’ ‘Segulai Sejalai’ ‘Peji Peju Pejoh’, ti sama reti enggau tuju iya nya penyerakup enggau pengelantang.
“Pengerami Gawai Dayak tu nyadika pelasar ngagai kitai ngangkatka penyerakup enggau pengelantang enda ngira pupu bansa, ngambika nyadi model tauka chunto ngagai menua bukai,” ku iya.
Nitihku Manyin, Najib disadang datai 3 Jun pukul 8.15 malam lalu dulu ari nya Adenan disadang datai pukul 8 malam sereta orang mayuh di pinta datai berengkah ari pukul 5 lemai.
Entara program ti bisi diatur, empat iku Kumang ari tetiap etnik Dayak iya nya Iban, Bidayuh enggau Orang Ulu deka bejalai maya pengerami tu kelimpah ari mandangka adat enggau main asal bansa Dayak.
Bisi datai dalam aum pengarang berita nya, Presiden Federation Orang Ulu Association Sarawak Malaysia Gerawat Gala, sekretari besai SIDS Datin Senorita Linang enggau ke bukai.