SIBU: Operasyen kena ngenukuka pengelikun semua perengka pengangkut ai sereta penumpang renggat nengeri Sarawak berebak enggau Pengerami Gawai Dayak tu udah berengkah dipejalai empai lama ke udah.
Berindik ari penumpang ke majak nambah, tebal agi fokus operasyen tu bepalan di Sibu sereta semanjai Batang Rajang mungkur pelilih mit Song, Baleh sereta Kapit.
Bejaku ngagai pemberita maya pengawa nya dipenyadi bepalan di Phase 1 Pasar Sibu, Chairman Opis Penguasa Sungai Sarawak (SRB) Dr Murni Suhaili madah, urung 300 iku pemesai penerit kuasa nyengkaum raban ari ejensi perintah bukai deka bekerejasama bejalaika pengawa nyaga sereta meresa kandang sungai kena nyeliahka sebarang penusah nyadi.
Murni nandu, semua perengka pengangkut ai di serata Sungai di Sarawak deka diperesa magang lebih agi pejalai ari Sibu-Kapit-Belaga-Baleh.
Renggat keterubah operasyen tu udah berengkah dipejalaika nyentuk 31 Mei tu lalu renggat pengudah nya deka dipejalaika kena 5 nyentuk 7 Jun sereta kepenudi endar berengkah ari 10 nyentuk 14 Jun.
“Kami ngadang pejalai ari Sibu-Song-Kapit ti pemadu kiruh rambau nya. Nya alai, SRB udah meri tanggungpengawa ngagai 195 iku raban pemesai penerit adat sereta 100 pemesai ari opis polis, Ejensi Penerit Adat Tasik Malaysia (APIMM), Opis Raban Penyaga Pengelikun Mensia Mayuh (JPAM), sereta Raban Relawan Malaysia (RELA) ari serata menua tu.
“Kami mega deka nagang bot kelalu sarat mai barang tauka orang tambang lebih ari patut, iya nya neritka atur tauka polisi ‘Nadai Tiket, Enda Nepan’ di Palan Penyangkai ti alai orang tambang ke nadai ngembuan tiket enda disagi tama ngagai palan penyangkai bot.
“Kelimpah ari nagang mai barang tauka orang tambang lebih ari patut, operasyen tu mega nyengkaum meresa perengka pengelikun dalam bot sereta meresa permit perengka pengangkut sungai ti dikemendarka,” ku iya.
Kontroller SRB William Jinep madah, operasyen nya deka dipejalaika di serata nengeri tu.
Ku iya, operasyen nya berengkah ari Lawas, Limbang, Baram (Marudi, Long Lama enggau Mulu), Sungai Rajang, Pusa, Lingga, Sebuyau, Sri Aman ngagai Kuching, Sibu, Sarikei enggau Tanjung Manis.
Berebak enggau nya, Murni nangkan orang ti deriba bot nya enda tau mabuk.
Iya mega ngansak raban orang tambang ngisi perenang diri, pekara tu dikena nagang pejalai orang tambang nepan bot enti sema iya udah penuh.
Iya ngelalau semua staff SRB bejalaika tanggungpengawa sida enggau manah.
Sida mega diperansang mantu orang tuai enggau nembiak mit maya niki tauka nurun ari bot.
Dalam jaku dipansutka iya ba mua pemberita, Murni madah, taun nyin kemari penyampau orang tambang nengah Palan Penyangkai Bot Ekspres Sibu entara 5,000 ngagai 6,000 iku, lalu ari Palan Penyangkai Orang Tambang Kapit urung 3,000 ngagai 4,000 iku bisi dirikod sebedau pengerami Gawai Dayak.
Ku iya nampung jaku madahka diri ngadang peminta deka nambah, opis nya deka nambahka penyuah pejalai bot, dikena nentuka bot ti chukup dikena nampung orang tambang ti nambah rambau pengerami baka tu, ku iya.
Sebedau nya, Murni ngiring Jinep enggau asistan kontroller SRB, Christopher Chan meresa pengawa bebaris.