SARATOK: Mandal Chairman Parti Demokratik Progresif Sarawak (SPDP) sitak Kunsil Nengeri (DUN) Krian, Kilat Beriak madah, Serakup Apai Indai enggau Pengajar (PIBG) nya sebengkah pelasar ti signifikan kena ngemansangka sesebuah sekula.
Ku iya, tanggungpengawa PIBG di sekula enda ulih disangkal agi sereta iya mai pangka ti besai ngagai pengawa pemansang enggau pemujur sekula laban PIBG tu mih penyambung kena nentuka penunga juluk sekula nya nuju pemujur ba pekara pelajar.
“Pemujur sesebengkah serakup bepanggai ba elemen ke patut dipejalai begulai.
“Nya alai aku minta semua kitai, enda ngira bida jalai pengarap tauka bansa, besaup mantaika penemu seraya ngenegapka kaul nengah PIBG ungkup pemansang pelajar anak kita di sekula,” ku iya.
Iya mansutka jaku nya maya bejadika Pengerami Mantar Gawai Sekula Primari (SK) Ulu Kabo, Saratok 2015 ke diatur PIBG sekula nya bepalan di dewan sekula nya semak ditu, malam ensana.
Ku iya, penyulut pelajar zanak kitai diatu ngemeratka kuing runding enggau pengidup sida jemah ila. Nya alai, dikena nentuka tuju enggau juluk pelajar baka ti dikedeka kitai, seiti ari strategi ke patut dipejalaika kitai iya nya ngerapitka kaul entara sekula enggau raban apai indai nengah PIBG.
“Tanggungpengawa enggau kaul ti manah entara raban ipai indai, pengajar enggau mensia mayuh ke diau bekelingi patut seruran dikemerat sereta dikenegapka,” ku iya manta.
Kelimpah ari nya, PIBG mega ulih nyadi penyanding ngagai pengerapit kaul enggau ejensi perintah sereta raban ejensi ukai dikuasa perintah (NGO) dikena ngadaka serakup enggau besaup ti mai pemaik ngagai semua.
“Nya alai, tanggungpengawa PIBG patut besaup enggau piak ngurus sekula. Pelajar moral sereta nilai modal mensia patut diajar ngagai raban nembiak kena nyeliahka sida teparuk ba ulah ti enda manah,” ku iya.
Nya alai ku iya, PIBG di sekula patut aktif bejalaika tanggungpengawa enggau nitihka langkar ngambika iya ulih meri batang pengaw ti mai reti sereta pangka ti besai ngagai pemujur baka ti dikearapka.
“Penemu dikena bejalaika pengawa enggau mujur patut seruran dikemeranka ngambi PIBG terus relevan nyadi penyanding ba pemujur pelajar nembiak,” ku iya.
Bela bisi datai ngulu pengerami malam nya, Kepala Pengajar Sekula, Lem Riji enggau raban pengajar kanan sekula sereta raban komiti PIBG ke bukai.
Berebak enggau pengerami nya, bela disaup ngerichahka atur pengawa baka nyabut tiket benasit, ngirup air pengayu, pengawa nyirap kek gawai, pengawa belagu dipelanja sereta pemerindang sada nyawa emas.