PEMAKAI ASAL: Abang Johari enggau Jumaani, Talib enggau Abdul Karim bejalai ngagai bansal bazar Pesta Gawai Kubah Ria 2015.
KUCHING: Perintah nengeri deka bejadika sebengkah komiti ti bejalaika pengawa ti mungkur semua bansa enggau jalai pengarap di Sarawak dalam bulan Ogos tu, pia ku Menteri Dagang Temuai Datuk Amar Abang Johari Tun Openg.
Nitihku iya ti mega deka nyadi chairman komiti nya madah, nya ditumbuh beserimbai enggau mengeri tu dichiri Yayasan Pencegahan Jenayah Malaysia (MCPF) nyadi ‘unity city’ chunto dalam Malaysia.
“Sebuah gerempung ukai dikuasa perintah (NGO) ari Kuala Lumpur ti bechairmanka Tan Sri Lee Lam Thye ti megai tanggungpengawa ngelakuka penyerakup di Malaysia udah meri gelar nya ngagai Kuching nyadi mengeri model dalam Malaysia, ti nempa penyerakup rayat pupu bansa enggau jalai pengarap.
“Kitai di Sarawak enggau Kepala Menteri nerima perambu nya, lalu sebuah komiti deka ditumbuh ti bejalaika pengawa nempa penyerakup rayat pupu bansa enggau jalai pengarap di mengeri tu.
“Tu basa ti diberi sida ti nadai pemerat di Sarawak, lalu komiti tu deka dipenyadika bulan Ogos tu,” ku iya maya pengerami bejadika Pesta Gawai Kubah Ria 2015 ditu, malam Hari Satu tu tadi.
Bejaku baru Menteri Pengawa Berumah nya madah, nengah komiti nya dia DBKU enggau MBKS bejalaika aktiviti ti mungkur semua bansa ila.
Ngenang pasal pengerami nya ti disikap Bazaar Gawai, Abang Johari madahka pengerami nya ulih meri kelala main asal raban bansa Dayak ti nyambut pengerami Gawai, sebaka enggau bazaar maya Hari Raya enggau Tahun Baru China di mengeri tu.
“Kitai berasai temegah ati ngagai pengatur (pengerami) tu lalu kitai deka ngemasukka pengerami tu dalam Kalender Dagang temuai Sarawak ninting bulan Jun, ninting taun,” ku iya.
Dulu ari nya Menteri Muda Dagang Temuai ti mega nyadi Chairman Komiti Pengatur dalam jaku pengelalu madah, pengerami nya diatur berengkah 25 nyentuk 30 Mei 2015.
“Pengerami tu deka mandangka elemen festival di Sarawak ti kaya enggau pesaka asal sereta mantaika pemayuh adat enggau main asal senipak enggau Tahun Festival Malaysia (MyFest),” ku iya seraya madahka nya keterubah endar diatur begulai enggau Opis Menteri Dagang Temuai sereta Perbadanan Pembangunan Ekonomi Sarawak (SEDC).
Atur pengawa bejadika pengerami dipun enggau pengawa miring lalu ditangkanka pengawa bejalai ba panggau ari bala pemenang enggau finalis ‘Ratu Cantik Festival Menuai Sedunia’ (WHF 2015) enggau beperindang enggau raban artis.
Bisi 56 bansal dibuka enggau tuju meri peluang ngagai orang dagang menua tu bejual seraya ngelakuka produk sida, kelimpah ari ngayanka adat enggau main asal Dayak di Sarawak.
Kelimpah ari nya mega bisi diatur pekit muzik etnik kreatif (26 Mei), pekit karaoke lagu Dayak tebuka ngagai orang besai tuai, veteran enggau anak mit (27 – 29 Mei) enggau malam pengerami besai Pesta Gawai Kubah Ria 2015 (30 Mei).
Sama datai ngulu pengerami malam nya, bini Abang Johari, Datin Amar Jumaani enggau Menteri Muda Pemansang Raban Nembiak (Mengeri) Datuk Abdul Karim Rahman Hamzah.