KUCHING: Lebih 100 iku ari Genturung Pendiau Sesang, Roban, Gerigat enggau sekeda rumah panjai ngelingi kandang menua Saratok udah ngulu seminar dagang ti diatur Balai Dagang enggau Industri Dayak (DCCI) ngelama dua hari berunggu begempung enggau Kaunsil Penyanding Penemu 1Malaysia Sarawak (1MSAC) di Saratok apin lama ti udah.
Kos nya udah dipenyadi Datuk Joseph Salang, ti mega presiden DCCI sereta chairman 1MSAC.
Bela bisi ngulu seminar nya, MP Mas Gading ti mega kaban kaunsil 1MSAC, Anthony Nogeh, Sapit presiden DCCI, Kilat Beriak enggau eksekutif sekreteri Terence Temenggong Jayang.
Dalam penerang ti dipansut sekreteriat DCCI madah, seminar ti diatur nya mungkur isu pasal pelasar penemu bekaul enggau pengawa dagang sereta chara nyendiaka diri masuk ba aktiviti dagang.
Sekeda modul kos nyengkaum, program orientasi operasyen dagang, penemu bekaul produk enggau strategi bejual bepelasarka konsep ‘Blue Ocean Strategy’.
“Pesereta ti udah ngulu sereta nembuka kos ngelama dua hari nya deka dikemata nengah sebengkah program ti dikumbai ‘mentoring programme’ ngelama sebulan dikena ngelala penalam pengerindu enggau pengeliat sida ba pengawa dagang.
“‘Mentoring programme’ nya deka dipejalaika di Saratok dalam kandang bulan Julai taun tu,” ku sekreteriat DCCI.
Nitihka penerang, kos nya mega dipejalaika ‘OnePeople System’, pengelatih ti dikemendarka 1MSAC.