Kemeranka pengawa bekebun ngena chara komersil: Mawan

0

Orang ke bagas ba pengawa bekebun deka ngasaika penyamai enggau pengelantang pengidup jemah

SARATOK: Rayat menua pesisir dilalau berunding panjai sereta anang enda bebendar bejalaika pengawa bekebun.

Menteri Pemansang Rama Tan Sri William Mawan Ikom madah, pengawa bekebun tau meri pangka ke besai ngagai ekonomi menua.

“Anang semina ngereja pengawa bekebun semina dikena nupi diri aja tang kereja meh pengawa enggau bebendar awakka ulih mai kita nyadi kaya.

“Kemansangka pengawa bekebun baka nyadi ‘lubuk emas’ ke ulih ngubah pengidup kita,” ku iya rambau bejadi Licha Bekebun Moden Komersil 2015 ke diatur Opis Betanam Betupi Nengeri Sarawak Pelilih Saratok di Rumah Dickson Chendang, Rantau Kechala, Kabo ditu empai lama ke udah.

Sama bisi datai Pemesai Opis Pemansang Betanam Betupi (IADA) Kalaka Saribas Rasheed Abdul Rahman, Pemesai Opis Koko Malaysia Nancy Majing, Pemesai Opis Lada Malaysia Jerry Albert, Tuai Rumah Dickson sereta temuai ke bukai.

Kaban Parlimen Saratok tu mega madahka rayat menua pesisir patut ngubah chara sida bekebun nitihka chara moden.

“Komersilka utai tanam kita. Anang bekebun ungkup diri empu aja tang gaga meh kebun dandang besai. Enti bisi tanah, kereja enggau bebendar.

“Dunya diatu nyema bagas ngereja pengawa, orang nya meh ngasaika penyamai, beduit asil ari penguntung.

“Nya alai, kereja pengawa betanam betupi chara moden diatu seriris enggau ubah pemansang dunya. Anang kitai tinggal ari pemansang pengawa bekebun,” ku iya.

Iya mega nesau bala Tuai Rumah ngambika nempa kaul enggau bala pemesai ari Opis Betanam Betupi ngambika ulih nemu penerang ke pemadu baru pasal pengawa betanam betupi ke ulih diberi ngagai sida.

“Aku minta bala Tuai Rumah madahka ngagai nembiak redak ke bisi bekebun tu, anang lembau ngelawa bala pemesai ba Opis Betanam Betupi,” ku iya ke mega Kaban Kunsil Nengeri (ADUN) Pakan.

Ngenang pasal licha nya, Mawan madah program bta endang amat madah ungkup orang bekebun.

“Semua topik ke bisi dibantai endang ngenang pasal chara bekebun chara moden. Mayuh bengkah penemu ulih dipendingka kita nengah program tu.

“Nya alai, aku ngumbai licha tu pelasar ke pemadu mandah dikena ngemansangka bala pekebun di menua pesisir ngambika ulih besemekih ba renggat dunya,” ku iya.