SRI AMAN: Penerang ke dibantaika sebengkah akaun dalam media sosial facebook ke ngena nama ‘DUN Lingga’ dipeda ulih ngasuh mensia mayuh saru penemu pasal pengari rayat di sitak nya.
Ketuai Pemadah PBB Pampang DUN Lingga Awang Magerib Awang Ani madahka berindik ari nya kaban parti PBB Lingga udah ngaga ripot polis madahka pekara ti diterangka dalam facebook nya enda betul.
Tuju sida ngaga ripot polis dikena meresi nama Kaban Kunsil Nengeri (ADUN) Lingga Simoi Peri, Pusat Khidmat Masyarakat DUN Lingga enggau PBB N.23 DUN Lingga, ari sebarang penerang ti enda betul.
“Penumbuh akaun ‘DUN Lingga’ nya dipeda semina betuju dikena ngujingka runding rayat sereta dikena ngelabuhka (ADUN Lingga) YB Simoi Peri ke majak diterima rayat.
“Kitai sama nemu diatu pengawa bepilih (PRN) nyau majak semak lalu nyangka penumbuh akaun facebook nya ngembuan agenda politik,” ku Awang dalam penerang berita.
Nambahka nya Ketuai Raban Indu PBB DUN Lingga Kamis Sita Wasli madahka orang ke numbuhka akaun facebook nya mega ngena gambar ADUN Lingga baka dikena ngayanka facebook nya dipenggi YB Simoi tauka Pusat Khidmat Masyarakat DUN Lingga.
“Laban kami ngasaika tu tanggungjawab, nya alai kami kaban PBB Pampang Lingga endang patut ngaga ripot polis dikena meresi nama ADUN Lingga,” ku iya.
Kelimpah ari nya, Zaidi Abang Akim ti ngarika kaban enggau Ranting PBB Kpg Lingga mega madahka diri enda lantang ati ngagai orang ke nempa akaun facebook ‘DUN Lingga’ nya.
Zaidi madahka sepemanjai YB Simoi nyadi pengari rayat DUN Lingga, iya (Simoi) udah bejalaika tanggungjawab enggau manah.
“Iya (YB Simoi) ti nyadi ADUN chukup semak enggau rayat enda ngira bansa enggau jalai pengarap iya nya chara nemu penanggul ti ditapi rayat ba DUN Lingga,” ku iya rambau ngaga ripot nya.