Maya Pekit Kumang tauka Keling, ayan ngepan ti mandangka pengaya adat, main asal bansa Dayak
Dikarang Chris Bishop //
KUCHING: Pekit Kumang Gawai ngayanka identiti bansa Dayak seraya ngenegapka penyiru kitai ba main asal diri ngambika enda midang ditaban arus pemansang lalu bisi belama dikembuan rebak dudi jemah ila, ku Manageress Dayak Culturural Foundation (DCF) Datin Senorita Linang.
Iya ke mega Sekretari Besai Serakup Indu Dayak Sarawak (SIDS) pechaya, maya tiap pengerami gawai sekalika diintu di rumah panjai tauka di mengeri, bansa Dayak jarang ngelengka pekit kumang tauka keling nyentuk ke diatu.
“Berebak enggau pengiruh kitai ngintu pengerami Gawai, Pekit Kumang tauka Keling nya sebengkah palan endur bansa Dayak ngayanka identiti diri ngagai bansa bukai.
“Kitai nemu nengah pekit ti mandangka ngepan orang indu baik nya Iban, Orang Ulu tauka Bidayuh, mensia, lebih agi temuai ari menua bukai lalu ngelala, kitai bansa Dayak endang bisi nguan pulau Borneo tu.
“Bansa Dayak endang pegari ngembuan pengaya ba adat enggau main asal. Pengawa ngerami Gawai ba dedini endur deka berasai timpang enti enda diumba ngena pengelundai ajat,” ku iya lebuh dirandau kemari.
Suah agi, ku iya, ninting taun pengerami ngintu Gawai diselit ngena Pekit Kumang lalu pekara nya nyaup ngintu pemaik sereta siruka main asal diri.
Ari nya, nembiak rebak baru ngelala identiti diri nengah pengerami ke diatur ninting taun, tandu iya.
Datin Senorita ke ngembuan mayuh peneleba ngatur Pekit Kumang kenyau ari taun 1966 nyentuk diatu ke alai iya mega suah diambi nyadi akim kelimpah ari nyadi pengabang dipebasa. Iya kala nyadi kumang gawai renggat nengeri dulu suba.
Seiku aktivis Dayak, Mabong Unggang pechaya Pekit Kumang ulih nyaup ngenegapka identiti bansa Dayak.
Ku iya ke mega Pengatur Main Asal Asadia (Akademi Serkaup Dayak Iban), pekit nya mandangka pengaya main asal enggau ngepan asal bansa Dayak.
“Kelimpah ari nya, pekit tu mega ulih nyungkak penatai pemisi bansa Dayak enti diatur nengah chara ke betul,” ku iya seraya ke ngarap raban nembiak baru nemu asal bansa diri.
Enti sema semua kitai bansa nyikap diri ngena ngepan baka Keling tauka Kumang, orang ti ngaga sereta nyual ngepan deka bulih penatai pemisi, tandu iya.
Mabong mega ngasai, Pekit Kumang patut diatur nyentuk ba renggat dunya ngambika industri ngepan asal ulih mujur seraya nyungkak penatai pemisi.
“Taja pia semua pekit tu patut nitihka atur ti betul lalu ukai nitihka peneka seseiku ti sengapa nengkebang chara ngena ngepan,” ku Mabong.
Ngelansa cherita tuai kitai Iban kelia, Kumang tu seiku indu ti datai ari menua ke dikumbai Gelang Batu Benang ti udah ngadaka mayuh indu bajik.
Ari nya, gelar Kumang ngangkatka indu ke bajik, ngembuan mayuh penemu sereta landik betenun pia mega ngereja pengawa bukai.
Ketegal pemajik Kumang mih iya seruran nyadi buah mulut sereta diperebutka bala Bujang Berani.