LUBOK ANTU: Kaban Kunsil Nengeri (ADUN) Simanggang, Datuk Francis Harden Hollis minta bala ketuai raban bansa mantu Opis Pengintu Pengelantang Mensia Mayuh (JKM) nyidi sapa bala peranak rumah panjai sida ke endang patut nerima bantu ari JKM.
Iya madah, genap rumah panjai tauka genturung pendiau patut ngembuan penerang pasal nembiak redak ke dijaga sida ngambika opis ke bekaul baka JKM muntang meri bantu.
“Nengah perenang ti dikembuan bala ketuai mensia mayuh baka tuai rumah enggau ketuai kampung nya ngemuntangka ejensi ti bekaul meri bantu ngagai peranak rumah panjai tauka genturung pendiau ti begunaka bantu,” ku iya.
Menteri Muda Pemansang Menua Pesisir enggau Pengawa Berumah tu mansutka jaku nya rambau Program Randau enggau Bejuraika Pekara Lon Ngaga Rumah Panjai ke diatur bepalan di Rumah Wisley Bakak Maweng, Nanga Stamang semak ditu, empai lama ke udah.
Berebak enggau nya, iya mega meransang sebarang rumah panjai tauka genturung pendiau iya ke agi nadai ngembuan sebarang penerang bekaul enggau nembiak redak diri empu patut ngaduka pekara nya enggau lengkas.
“Genap penerang ti bisi dalam sistem nya ukai semina diguna raban JKM aja tang di Opis Pelilih Menua, Opis Residen, KEMAS enggau pengari rayat di pelilih menua nya beguna bendarka penerang ke bansa nya.
“Anang ngmbai penerang nya enda beguna laban nengah penerang nya ngemuntangka agi pengawa ejensi perintah meri bantu ke patut,” ku iya.
Nya alai, iya minta tuai rumah enggau ketuai kampung patut bejalaika tanggungpengawa sida dikena ngadaka sistem palan penerang di rumah panjai enggau genturung pendiau sida udah tu,”ku iya nandu.
Ba pengawa nya, iya mega bisi ngemendarka agih belanja kediri-kediri penyampau RM9,000 ngagai Komiti Pemansang enggau Pengelikun Genturung Pendiau (JKKK) Nanga Stamang enggau JKKK Nanga Spaya sentara agih belanja penyampau RM3,000 ngagai Biro Orang Indu kededua JKKK nya.