Prestasi PPD Kanowit chukup ngemegah ati

0

Naka diatu PPD Kanowit mujur nyadi entara lima ari PPD pemadu nyulut di Sarawak

KANOWIT: Pemujur nyadi lima ari Opis Pelajar Pelilih (PPD) ke pemadu tinggi prestasi ari semua PPD ke bisi di serata nengeri tu mandangka sekula menua pesisir baka di Kanowit ukai semina ulih besemekih tang mega mujur ngalahka sekula di kandang mengeri.

Kaban Kunsil Nengeri (ADUN) kawasan Ngemah Alexander Vincent madah, prestasi pelajar di Kanowit diatu chukup ngemegahka peranak menua tu.

“Kitai enggai alah ba pengawa ngemanahka agi prestasi tu taja kitai bepalan di menua pesisir. Sekula kitai mega udah dikelala ba renggat nasional ketegal ari pemujur ba bidang akademik enggau ko-kurikulum,” ku iya.

Iya madah munyi nya rambau Pengerami Hari Pengajar Renggat Kanowit di SMK Nanga Dap ditu, ensana.

Alexander ngarapka semua pemadas pengawa, pengeransing enggau pemaik kerejasama ari mensia mayuh ulih dikemeranka agi dikena ngemansangka pekara pelajar di Kanowit.

Berebak enggau nya, maya tu bisi bisi 79 iku penerima ‘Anugerah Kecemerlangan Perkhidmatan Pelajaran (APC)’ di pelilih tu udah dirami.

Sama bisi datai maya tu iya nya Sekretari  Politik kepada Kepala Menteri Maurice Giri, Pemesai Opis Pelajar Pelilih Kanowit Malsiah Jamal, Chairman Kaunsil Kepala Pengajar Kanowit Jabut Minda enggau Prinsipal SMK Nanga Dap Etam Linggie.

Dulu ari nya, Malsiah bisi madahka PPD Kanowit entara lima buah PPD ke pemadu manah di Sarawak berindik ari prestasi sekula sekondari dalam akedemik enggau kokurikulum.

Iya madah, kebendar iya mayuh pengajar udah nunjukka perestasi nyulut tang semina 79 iku dipilih nerima APC ungkup taun tu.

“ Aku ngarapka PPD pelilih ulih ngetanka prestasi baka tu tauka bulih manah agi penuduk dudi harim” ku iya.

Iya mega meri terima kasih ngagai Alexander, Menteri Pemansang Tanah Datuk Gramong Juna enggau Kaban Parlimen Kanowit Datuk Aaron Ago Dagang laban ke udah mayuh meri peransang enggau bantu belanja dikena ngangkatka pemanah pekara pelajar di Kanowit.

Ba pengerami nya, Alexander bisi madahka diri deka ngungkupka geran ari perintah RM10,000 ngagai SMK Nanga Dap.