KUCHING: Bala Tuai Rumah di sitak Kunsil Nengeri Marudi udah numbuhka serakup kediri ti dikumbai Serakup Tuai Rumah Beluru Marudi.
Serakup nya udah dipenyadi Sekreteri Politik Kepala Menteri, Alexander Asing ba rumah panjai presiden serakup nya,Tr. Benang Pilang pengudah dikemendar Opis Pengerejista Gerempung (ROS).
Tr. Sayun anak Galan udah dipadu nyadi Sapit Presiden ditangkan Tr. Juben anak Sigai nyadi Sekreteri lalu Tr. Kompeni anak Agon dichiri nyadi Tukang Wang.
Kelimpah ari nya, tiga iku kaban eksekutif kaunsil mega udah dichiri iya nya Tr. Henry anak Gome, Tr. Musin anak Raden enggau Tr. Seman anak Reggie enggau Tr. John Marikan dichiri nyadi auditor serakup nya.
Lebuh bejaku enggau The Borneo Post ensanus, Alex madahka serakup nya deka nyadika penyambung kaul entara komuniti enggau perintah nengah sekeda opis, ejensi enggau NGO dikena ngerapitka kaul.
Ku iya baru, serakup nya mega deka nyadika pelasar ngagai komuniti ba kandang menua nya ngetanka atur enggau undang- undang, ngintu adat asal lalu ngelakuka main asal.
Sekreteri Politik Kepala Menteri nya mega madah,serakup nya nadai kaul enggau sebarang parti politik sereta deka negika peranak di menua nya enda ngira jalai pengarap tauka kaul politik.
Aku meransang bala tuai rumah masuk serakup tu enda ngira kaul politik ngambika sida bisi pengering mantaika penanggul rayat, pengingin enggau inspirasyen,” ku iya lebuh bejadi serakup nya.
Ku iya,bala tuai rumah ba kandang menua nya ulih bejalaika pengawa sida enggau manah agi sereta nyadi raban ari mua mantu perintah ngemunas pengawa berimba kampung sechara belalai kelebih agi ba tanah NCR sida.