Anang pambar ketegal pengarap politik: Mawan

0

Bansa Dayak meseti begempung ngambika ulih ngatur pendiau pengidup diri empu menyana agi

Dikarang Judan Bungap //

BINTANGOR: Menteri Pemansang Rama Tan Sri William Mawan Ikom (gambar) minta raban bansa Dayak anang pampar ari pangan diri ketegal pengarap politik ti enda sebaka.

Ku iya, raban bansa Dayak meseti begempung ngambika ulih ngatur pendiau pengidup diri empu menyana agi.

“Kitai enda ulih ngandalka orang bukai negapka penyerakup sereta ngangkatka pemansang bansa diri. Pia mega anang ninggalka diri ari penemu rama lebih agi pasal chara nambahka penatai pemisi,” pia ku iya maya bejadi pengerami Mantar Gawai Serakup Indu Dayak Sarawak (SIDS) Meradong ditu, empai lama tu tadi.

Nambahka nya, iya mega madahka raban bansa Dayak udah mujur ngayanka penyerakup nengah pengerami ke diatur.

“Pia mega, baka Gawai, kitai ulih begulai enggau raban bansa bukai bekunsika main asal kelimpah nempa penyerakup enggau orang bukai,” ku iya madah.

Ba pengerami nya, iya ti mega Presiden Parti Tenaga Rayat Sarawak (TERAS) bisi nyuaka geran RM20,000 ngagai SIDS Meradong, Gerempung Dayak Sarawak (SDNU) Meradong enggau Gerempung Tuai Rumah (PTR) Meradong.

Kelimpah ari nya, Direkter Besai Ferry Sungai Sian James Wong ti dipebasa bejaku maya pengerami tu mega ngarapka pengerami Hari Gawai ulih nyadi palan alai nempa penyerakup.

“Pia mega ukai semina raban bansa Dayak, bansa bukai mega tau nyadika pengerami diri empu alai nempa penyerakup enggau pangan diri.

“Pengerami baka tu engkeman alai nempa penyerakup lalu meseti ditampung ngagai rebak baru laban ukai semina alai berami mantaika main asal tang mega nyungkakka tikas rama nengeri Sarawak,” ku iya ti mega sepunsa pengerami sehari nya.

Bela bisi datai maya tu iya nya Sekretari Politik Kepala Menteri Romeo Christopher Tegong, Chairman SDNU Meradong Mathew Bato, Chairperson SIDS Meradong Mery Amorir, Penghulu Augustine Pau enggau Datuk Ting Check Sii.