DAP Sarawak suntuk isu dikena nyakal perintah BN

0

Dikarang Rengenyan Labang //

KUCHING: Parti Tindakan Demokratik (DAP) Sarawak semina numpang inisiatif Barisan Nasional (BN) ti deka ngurangka penusah rayat di menua tu.

Sekretari Jeneral Parti Pesaka Bumiputera Bersatu (PBB) Datuk Dr. Stephen Rundi Utom madahka, parti nya numpang inisiatif BN nyengkaum pengawa ngetuka bayar tol Jematan Lanang di Sibu.

Iya madahka ulah parti nya semina deka ngeruga runding sekeda orang sereta ngemaruhka pengawa perintah.

“Pasal aum Tan Sri Ling C H (Shin Yang) enggau Dato Henry Lau (KTS), DAP enda kala bisi sangkut paut tauka begulai enggau tim aum sereta kededua pemesai nya enda kala nyebut sida DAP dalam surat nuju ngagai Kepala Menteri, ti setuju ngetuka bayar tol.

“Nya alai DAP semina numpang inisiatif BN ti deka ngurangka penusah orang mayuh ke ngena jematan nya, lalu kami beterima kasih ngagai dua buah kompeni nya laban pemanah ati sida, tang ukai ketegal penyakal.

“Sida (penyakal) semampai deka ngiga penguntung politik ari semua pekara tauka inisiatif manah perintah, lalu mantah sebarang pengurang perintah,” ku iya madah ngagai pengarang berita.

Nambahka nya Menteri Muda Perengka Guna Mensia Mayuh (Elektrik enggau Perengka Penyambung) nya madahka DAP seruran deka nemu nama pengawa ti deka dipejalaika perintah ngambika ulih nguntungka sida (DAP).

Tang rayat udah nemu endar pasal taktik tauka chara parti nya, tambah mega parti nya udah tepagang isu ke deka dibantah tauka dikelikuh dikena ngeruga runding sekeda rayat, ku iya.

“Kepala Menteri kitai udah ngaga mayuh pemanah kenyau hari keterubah iya megai kuasa sereta majak ngamatka semaya iya kena nguntungka rayat.

“Enda baka DAP ti ngemaruhka pengawa ti baka nya, kebuah iya laban sida suntuk isu ti ulih dikena sida nyakal perintah.

“Taja pia kitai rayat nemu amat taktik tauka chara nya (DAP) laku enda mudah dikemula propaganda DAP,” ku iya.

Kelimpah ari nya ku Dr. Rundi, Chairman DAP Sarawak Chong Chieng Jen maya bejuraika Langgur Pemansang Malaysia Lumpar Kesebelas di Parlimen muji diri sereta ngumbai diri mujur ngurangka bayar elektrik.

Iya (Chong) mega nyakal pengawa perintah bekaul enggau penyampau 51 peratus orang dagang Bumiputera dalam kompeni pengudar barang.

“Beduduk ari pekara nya iya lau ngumbai kompeni ti baka nya deka lenyau semekih, nya baka ngayanka iya (Chong) enda arapka Bumiputera ulih bejalaika pengawa dagang,” ku iya.