Dikarang Judan Bungap //
SIBU: Sapit Kepala Menteri Datuk Patinggi Tan Sri Alfred Jabu Numpang bisi datai ngulu Pengerami Makai Lemai Mantar Gawai Dayak Sibu 2015 ba sebengkah hotel ditu, empai lama tu tadi.
Pengerami tu diatur begulai Serakup Indu Dayak Sarawak (SIDS) Pampang Sibu begulai enggau Gerempung Dayak Sarawak (SDNU) Pampang Sibu, SDNU Pati Sibu Jaya, SDNU Pati Rejang enggau Gerempung Orang Ulu (OUNA) Sibu.
Maya ke bejaku ba pengerami tu, Jabu minta bala nembiak sekula ngemeratka pemujur ba Jaku English bepun ari maya hari tu mayuh graduate empai bulih pengawa ketegal penanggul enda landik ba Jaku English.
Ba pengerami tu Jabu dipebasa nyuaka peransang pelajar ngagai 116 iku nembiak ke udah mujur ba pemutus peresa UPSR, PT3, SPM enggau STPM.
Iya mega nyuakan geran projek mit menua pesisir RM7,000 ngagai SIDS Pampang Sibu, Skuau, Sarikei, Pakan, Meradong, Song enggau Kapit.
Kelimpah ari nya, komiti mega bisi ngatur Pekit Kumang enggau Keling Gawai Dayak Sibu 2015.
Bela bisi datai maya tu iya nya Menteri Wang II Dato Sri Wong Soon Koh, Kaban Kunsil Nengeri (ADUN) Nangka Annuar Rapaee enggau Chairperson Komiti Pengatur ti mega Chairperson Serakup Indu Dayak Sarawak (SIDS) pampang Sibu Dato Ir Alice Jawan.