RM2.5 juta dividen sawit 2014 mujur disuaka KTS Pelita ungkup 219 pekebun di Simunjan

0

SIMUNJAN: KTS Pelita (Simunjan) Sdn Bhd udah meri dividen RM2.5 juta ngagai raban pekebun kunsi ke nyereta Projek Kebun Sawit Dandang Besai tanah Adat Bansa Asal (NCR).

Bisi 219 iku raban pekebun sawit nerima chek sida ensana lalu kesemua iya penyampau RM750,000 sereta ketebal agi sida tu nerima dividen ari RM1,000 ngagai RM7,000.

Pengawa nyuaka chek tu diatur bepalan di Opis Kebun Sawit Dandang Besai KTS Pelita (Simunjan) Sdn Bhd seraya dikemataka pengari ari Opis Menteri Pemansang Tanah enggau Opis Nyaga Tanah enggau Kaunsil Pemansang (PELITA).

Raban pekebun sawit sekali tu nerima dividen ungkup taun 2014, iya nya bayar nitihka penyampau RM590.70 perhektar enti dibandingka enggau taun 2013 iya nya RM920 perhektar.

Kesemua raban pekebun sawit ari Blok Sabal Kiruh iya ke pemesai kebun penyampau 1,269.49 hektar ari penyampau pemesai kandang kebun 2,921.31 hektar ti udah dikemansang nyadi kebun sawit dandang besai.

Beremas Nangkai, 57 taun, seiku ari raban ti nerima dividen paling besai iya nya penyampau RM39,138, iya ke ngembuan pemesai kebun penyampau 66.253 hektar.

“Aku berasai gaga ati udah nerima dividen iya ti keterubah iya nerima dividen ngemayuh nya. Taun seiti kemari, aku semina nerima penyampau RM300 bayar insentif,” ku ini ke ngembuan tiga iku uchu sepengudah pengawa nya diatur.

Ku iya, duit nya deka disimpan kelimpah diperanaka ba akaun Amanah Saham Nasional Berhad (ASNB).

Kenu ku iya, pemendar tanah NCR nya udah diberi ngagai iya dalam taun 2001 sereta udah dikemansangka iya nyadi kebun sawit dandang besai dalam taun 2003.

Sentara nya, maya 22 Mei tu kemari, duit insentif mega udah diberi ngagai penyereta nitihka pemesai kebun sawit sida ti semua iya ngembuan pemesai 1,228.756 hektar.

Taun seiti kemai penyampau RM750,000 dividen disuaka ngagai 171 iku raban pekebun sawit.