Diatu rayat ke nguan rumah panjai udah ngasaika mayuh pemansang fizikal, pikir sida mega patut tebuka
KAPIT: Kaban Parlimen Ulu Rajang Wilson Ugak Kumbong ngelalau mensia mayuh ke diau di rumah panjai ngubah runding diri ngambika seriris enggau ubah pemansang dunya kemaya hari. “Perintah udah ngemai pemansang fizikal ngagai kita.
Diatu, kita di menua pesisir ngasaika bekal kuasa karan nengah “Projek Kuasa Karan Menua Pesisir’ enggau bekal ai beresi disambung terus nengah paip nuju rumah di menua pesisir.
Suba, peranak Mujong ngena perau panjai enti deka ngelawa pasar Kapit, tu begunaka mayuh belanja sereta enda likun tang diatu sida udah ulih nengah jalai alun ngelawa pasar, chukup likun sereta murah.
Pemansang fizikal enggau perengka infrastruktur ke lebih manah di menua pesisir udah nyungkak pemanah pengidup kitai tang nya bedau chukup, laban kita patut dulu ngubah runding diri nitih arus pemansang dunya kemaya hari,” ku iya.
“Kita udah meri sukung ngagai aku nengah undi ke diberi kita. Nya alai, aku nemu tanggungpengawa meretika peneka enggau peminta raban kita. “Aku besemaya deka bejalaika tanggungpengawa ngemai pemansang ngagai menua Baleh kitu, ke mega menua asal aku.
“Ba aku pengawa politik tu ukai palan endur kitai betalat ke penemu tang dikena kitai mai pengawa pemansang ke mai penguntung ngagai rayat. “Kami udah nganggau ke Menteri Besai, Najib Razak datai nemuai ngagai Rumah Benggau, Nanga Sut, Baleh, kena 16 Jun tu ila ngambika iya ulih meda sereta ngasaika penusah kitai ke empai bulih jalai raya ditu.
“Apin lama ke udah, perintah menua udah ngemendarka tambah penyampau RM500 juta agih belanja dikena ngemansangka menua pesisir. “Aku dilalau enda bechiping ngagihka belanja ngagai bagi menua Kapit, seraya di bagi menua Ulu Rajang ke dipegai aku, pemesai kandang menua tu nyauka mesai menua Pahang, dalam kandang menua pesisir,” ku Ugak lebuh bejadika pengawa “Makai Selamat Nyerumba Pengawa Bejadika Palan Baru Rumah Labaw, Teluk Gemang, Mujong, Baleh apin lama ke udah.
Ugak dipebasa bejadika taba rumah baru nitihka adat asal Iban. Taun nyin kemari Ugak udah ngemendarka agih belanja penyampau RM100,000 ba baruh Projek Mesra Raktyat dikena nulak taba baru Rumah Labaw ke dulu agi udah didirika ba tanah seberai Sungai Baleh.
Urung 18 buah bilik rumah panjai deka dientak ditu enda lama agi. Ba pekara Chukai Barang enggau Servis (GST), Ugak madahka lebih 160 buah menua di serata dunya udah bejalaika GST tu. Iya madahka GST tu sebengkah sistem chukai ke enda bechiping. Iya nandu baru enti sema iya enda manah, enda patut iya dipejalaika ba menua bukai.
“Ngelamatu kitai seruran bebayarka chukai tang kitai enda sedar ke pekara nya. Sebedau tu 10 peratus chukai jualan tang diatu semina enam peratus aja.
Uji kitai berunding, perengka diguna ninting hari baka minyak, minyak makai, tepung, beras, gula enggau ke bukai nadai dichaj chukai. Enti sema kita ngelawa palan pemerindang sereta meli ai bisa berega RM150, kita deka dichaj 10 peratus, kita deka mayar RM165. Duit GST dikena perintah meri penguntung ngagai rayat,” ku iya nerang.
Ugak nerima mayuh ripot madahka barang enggau servis diatu majak mar. Iya ngelalau sida minta resit lalu ngaga riput ngagai Opis Menteri Dagang Dalam Menua, Koperasi enggau Orang Bebelika Barang (KPDNKK).
Iya ngansak ejensi nerit ke adat bejalaika pengawa sida berindik ari riput ke bisi digaga sereta nangkap lalu nawa raban orang dagang ke enda nitihka atur. “Kapit ke tebal agi diwan raban bansa Dayak. Beserimbai enggau Pengerami Gawai Dayak tu.
Aku minta raban KPDNKK bejalaika tanggungpenagwa sida enggau manah. “Sida patut bejalai matau rega barang dikena nentuka raban orang dagang nitihka atur ke udah ditetapka.
“Anang semina duduk di opis aja laban gaji sida dibayar ari chukai ke dibayar raban mensia mayuh. “Aku ngansak raban Opis Kastam enggau KPDNKK bejalai ngagai rumah panjai di menua pesisir nerangka sereta mantai barang ke enda dichaj GST, sereta tu deka mai penguntung ngagai rayat,” ku iya.
Iya udah nya ngemendarka penyampau RM30,000 agih belanja dikena mantu peranak rumah panjai berumah baru. Sama bela bisi datai ngulu pengawa Sekretari Politik ngagai Kepala Menteri Sarawak Wilson Nyabong Ijang, Ex-Sekretari Politik Kepala Menteri Sarawak Robertson Mawa enggau Joseph Jinggut, Assistant Kanan Direktor Opis Pengereja Pengawa Khusyairy Pangkas, Pemanca David Dian, Penghulu Sallang Batang, Pengulu Stewart Saweng, Pengulu Undie Bajai, Menijar RHB Kapit, Solomon Kumbong.