KE PENGINGAT: Adenan (tiga kiba) enggau Nansian besaup ngesan bidai ke nyadi tepa ti disua ngagai Adenan seraya dikemata Taib (kanan) ba Karnival Gawai Redeems Ke-10 malam ensanus.
Pinta RM2j kena ngemansangka Palan Main Asal Redeems dipenggi tauka enda bepanggai ba sukung rayat dia
Dikarang Chris Bishop //
BAU: Palan Main Asal Redeems disadang berengkah digaga tembu pengawa bepilih besai nengeri (PRN) ti ke-11 tu ila pengudah Kepala Menteri Datuk Patinggi Tan Sri Adenan Satem setuju ngungkupka belanja RM2 juta.
Taja pia Adenan deka meda rayat di Bau lebih agi di Tasik Biru sekalika sida nyukung pengari perintah Barisan Nasional maya PRN tu ila tauka enda.
“Kita di Redeems anang irauka agih belanja RM2 juta nya.
Duit nya endang bisi ungkup kita tang aku deka meda dulu penegap penemu ari kita semua maya aku begunaka sukung.
“Kita semua patut nemu nama dikedeka aku. Anang enda ingatka aku. Enti kita semua meri sukung, aku bisi RM2 juta ungkup Redeems,” ku iya.
Adenan mansutka jaku nya maya bejadi Karnival Gawai Redeems ke-10 di Kampung Apar Singai ditu, malam ensanus ke alai pengerami nya bela digulu Tuai Pemegai Menua (TYT) Tun Pehin Sri Abdul Taib Mahmud sereta bini, Toh Puan Ragad Kurdi Taib.
Dulu agi ari nya Presiden Gerempung Pemansik enggau Pemansang Singai Sarawak (Redeems) Datuk Peter Nansian ba jaku pengelalu madah perambu Palan Main Asal Redeems kebeungkus RM8 juta mengkang kurang RM2 juta.
Nansian ke mega Menteri Muda tanggungpengawa Raban Bansa enggau Menteri Muda Pemansang Industri madah Redeems dulu agi ari tu udah nerima belanja RM4 juta ari Menteri Besai enggau RM2 juta ari Sapit Menteri Besai ba taun ke udah.
“Kededua seduai udah meri agih belanja nya lalu diatu kitai udah bisi RM6 juta.
Aku ngenataika pinta laluh RM2 juta ngagai Perintah Nengeri.
Pengudah kitai bisi duit nya projek ulih dipungkal dalam timpuh enam bulan lalu tembu dalam timpuh dua taun.
“Kepala Menteri kitai endang seruran siruka rayat sereta seruran ngadu pengawa ti nyaup ngelempung tating belanja rayat.
Kitai di Bau deka meri iya timpuh 10 taun agi lalu nya meh kebuah kitai datai bebala mayuh mandangka sukung malam tu.
“Kitai deka nyukung nuan lalu meri nuan timpuh panjai agi.
Rayat di Opar enggau Tasik Biru seruran bekereja enggau nuan,” ku iya ke mega Kaban Kunsil Nengeri (ADUN) Tasik Biru.
Ba pengerami nya Taib bisi ngelanchar bup sentang Redeems ‘Singai Unveild’ sereta begulai enggau pengabang dipebasa bukai nyirap kek Karnival Gawai Redeems Ke-10.
Bela datai Menteri Pemansang Rama Tan Sri William Mawan, Menteri Opis Kunsil Kandang Menua enggau Pemansang Komuniti Dato Sri Wong Soon Koh, Menteri Pemansang Infrastruktur enggau Penyambung Dato Sri Michael Manyin, Bini Nansian Datin Rose Sanden enggau Mandal Presiden Redeems Datuk Wilfred Nissom.