Dikarang Judan Bungap //
SIBU: Penuduk Kunsil Nengeri N55 Katibas nyangka deka ngayanka mua baru ari Parti Tindakan Demokratik (DAP) maya pengawa bepilih nengeri (PRN) ti ke-11 tu ila.
Bisi jaku ngerimbas pending didinga DAP deka ngirai chalun sida ti kala ngempu gelar Mr Sarawak Borneo Hornbill Fetival 2011 iya nya Paren Nyawi ba penuduk nya.
Berita tu nyangka amat bepun ari penatai DAP ke ngatur licha ba Taman Rejang ditu alai Paren ngasuh mensia mayuh tekenyit maya iya niki ke panggau meri licha bekaul enggau aspirasi politik ungkup rayat lebih agi raban bansa Dayak di nengeri tu.
Maya nya, iya ke beumur 34 taun tu baka ke madahka diri deka bediri ba penuduk nya.
Chairman DAP Sarawak Chong Chieng Jen madah, Paren seiku chalun ngembuan pengelebih bediri ba DUN Katibas tang taja pan baka nya iya enggai nyebut enggau nenak agi.
“DAP deka bediri ba 30 iti penuduk nyengkaum ngetanka penuduk kami sebedau tu lalu Paren seiku chalun ti ngembuan pengelebih nyema iya bediri ila,” ku iya.
Chong mega madah, Paren udah tama enggau DAP empai lama tu tadi.
Paren kala gawa nyadi akauntan di Kuala Lumpur kenyau 10 taun ke udah tang iya ngelengkaka pengawa nya lalu mulaika diri ke menua iya empu di Song (Rumah Jarop) lalu bejinak enggau pengawa politik.
Maya berandau enggau Paren, iya berengkah deka malut diri enggau politik bepun ari tekait ati enggau sebengkah NGO di Kuala Lumpur ti ngemeratka tikas pengidup rayat di menua pesisir Sarawak.
Maya ke agi gawa di Kuala Lumpur iya kala enggau Persatuan Warisan Sarawak, sebengkah NGO ke ditumbuh rayat Sarawak ke diau gawa dia.
Udah iya ngempu gelar Mr Sarawak Borneo Hornbill Festival 2011, Paren dichiri nyadi komiti pengatur Borneo Hornbill Festival dalam kandang beberapa taun sebedau nama gelar nya ditukar ngagai Mr Borneo Ethnic.
Paren ti keterubah iya bejaku ba mua mensia mayuh malam Hari Minggu tu tadi madahka pemutus iya tama begulai enggau DAP laban deka meda ubah politik di nengeri tu.
Nambahka nya, ku iya, DAP sebengkah parti ti balat negika demokrasi rama rayat pupu raban bansa.
Maya Pengawa Bepilih Nengeri 2011, ba N55 Katibas, chalun ari Barisan Nasional (BN) Datuk Ambrose Blikau bulih 3,326 undi enggau majoriti 2,256 ngalahka chalun ari Parti Keadilan Rayat (PKR) Munan Laja (1,070) enggau chalun SNAP Toh Heng San (897).