Pilih mih pengari ke ulih mai pemansang maya PRN ila

0

BINTANGOR: Rayat menua pesisir dilalau anang beentaruhka pengelantang pendiau pengidup diri dudi hari ketegal ti salah pilih undi maya pengawa bepilih kunsil nengeri (PRN) ti deka datai.

Sekretari Politik Kepala Menteri Romeo Christopher Tegong madah, menua ke enda dipegai Barisan Nasional (BN) deka ngasaika pengerugi dalam kandang lima taun ketegal sekali aja ngundi.

“Ba timpuh tu, kita deka tinggal macham bengkah pemansang ari menua ke dipegai BN.

“Tanka sukung ngagai BN baka sukung kita ngelama tu,” pia ku iya madah.

Iya mantaika jaku tu maya datai ngulu Pengerami Ngiling Tikai ba Rumah Rami Sandai, Sungai Stumau, Meradong ditu, kilah ensana.

Pengerami tu bela digulu Ketuai Barisan Nasional Sarikei ti mega Ex-Kaban Parlimen Sarikei Ding Kong Hing, pengari Kaban Kunsil Nengeri (ADUN) Semop Abdullah Saidol, Sanlos Selamat, Direktor Besai Feri Bintangor James Wong enggau Chairman Gerempung Tuai Rumah (PTR) Pampang Meradong TR Rantie Ayai.

Nambahka nya, ku Romeo, raban nembiak mega anang enda ngerijista diri nyadi pengundi enti udah chukup umur.

Berebak enggau tu, iya ngelalau bala ke bisi datai maya nya ngambika berunding kediri empu baka ni gaya pengidup maya taun 2020 ti deka datai.

Ku iya, dalam lima taun agi pengidup rama deka belinsur berubah ti ngemeratka penatai pemisi ti tinggi.

“Anang nganu perintah enti kita bisi ngasaika ubah manggai taun 2020.

“Nya alai, anang bepanggai ba seiti jalai penatai pemisi aja laban sepintu bilik ambis nadai ngembuan penatai pemisi urung RM3,500 sebulan ngambika ulih besemekih pengidup enggau orang bukai,” ku iya madah.

Romeo madah, raban bansa Iban agi mayuh tanah alai numbuhka lada, koko, getah tauka sawit dikena nambahka penatai pemisi.

Iya madah, perintah bisi nyediaka macham bengkah skim dikena mantu rayat ba pekara betanam betupi.

“Bala tuai rumah anang sanggu niki opis perintah baka Opis Betanam Betupi nanya nama skim ke bisi diatur perintah.

“Enggau jaku bukai, anang ngelakka tanah kita pia aja tang tanam enggau lada, koko tauka utai tanam bukai,” ku iya madahka baru.

Ba pekara bukai, Romeo ngelalau peranak rumah panjai lebih agi sida ke bisi ngentak baru ngambi ngubah chara berumah ti ngemeratka pengelikun.

Ku iya, sida tau ngaga sapat nyentuk datai ba perabung ngambi nyema bisi penusah angus nyadi, api deka lubah agi nyerarai sebedau bomba datai ngesah.

“Pia mega, enti ulih kita tau ngambi insurans dikena napi pengerugi ketegal penusah angus,” ku iya seraya madah sida ke ngentak baru mega tau nganjung peminta Bantu Pengawa Berumah ngagai opis ti bekaul.

Ba pengerami tu, Abdullah Saidol bisi nyuaka bantu RM14,000 ngagai tujuh bengkah rumah panjai iya nya Rh Rami, Rh Rebi, Rh Sedadu, Rh Enggong, Rh Gabriel, Rh Baling enggau Rh Numpang.

Kelimpah ari nya, Opis Kunsil Menua Pesisir Meradong enggau Julau bela bisi nyuaka RM15,000 dikena ngemujurka projek ngemanahka jalai.

James Wong maya tu bela bisi nyuaka pemeri RM10,000 ngagai PTR Meradong enggau RM1,000 ngagai Rh Rami.