KUCHING: Bala nembiak Dayak ti ukai Islam ti belajar ba Maktab Rendah Sains Mara (MRSM) Betong enggau apai indai sida berasai asa endar ati enggau atur ti diteritka kolej nya,ke alai bala nembiak nya enda tau enda belajarka Bahasa Arab.
Kelimpah ari nya,bala nembiak Dayak ti ukai Islam di MRSM Betong mega enda tau enda pas ba sabjek nya ngambika maya graduate ila sida ulih nerima setipikit.
Chairman PKR Pampang Betong,Vernon Aji Kedit madahka pekara nya udah dikenataika ngagai iya, pengudah bala nembiak nya dipadahka pengelicha sida pasal pekara nya kena minggu siti nyin tadi.
“Penerang pasal pekara nya ngasaka ati bala nembiak Dayak ti ukai Islam enggau apai indai sida ti beratika pekara tu sebengkah agi singkang bekaul enggau Islam di Sarawak,” ku iya madah ngagai The Borneo Post kemari.
Vernon, ti mega ketuai pemadah PKR nengeri madah, pengudah iya mantaika pekara tu ngagai media sosial, iya lalu dipadahka MRSM Betong bala nembiak nya tau milih ngambi Bahasa Mandarin enti sida enggai ngambi Bahasa Arab.
Iya madahka mesej nya tau ngenyaruka bala nembiak di MRSM Betong.
“Aku, enggau tu minta Opis Menteri Pelajar ba Perintah Besai enggau Opis Pelajar di Sarawak netapka pekara tu nengah chara nulis surat ngagai mensia mayuh nerangka sabjek ti enda tau enda diambi enggau ‘Bahasa’ ba semua kolej MRSM di Sarawak dalam timpuh dua minggu ari sehari tu( kemari).”
Vernon mega minta raban ti bekaul nerangka pengamat ti nyadi di MRSM Betong, lalu enti semua pemutus nya digaga sepiak kolej aja ti ngenyaruka runding nembiak ti madahka sida enda tau enda ngambi sabjek Arab sereta nguji mejal sida ngambi sabjek nya.
“Enti ketegal enda chukup staf ngajar kelas sabjek bukai, nya ukai patut nyadika kebuah, laban kolej udah mantaika pekara nya nyentuk nyau nyadi topik ke angat ba media rama.”
Iya mega ngelalau “sekeda Prinsipal Kolej ari Malaysia barat ti kelalu gagit” gawa di Sarawak iya madahka Sarawak nengeri ‘secular’ nitihka Konsitusyen Nengeri Sarawak. Nya alai ku iya,sebarang chara dikena matak nembiak Dayak ukai Islam masuk pengarap nya enda diterima sereta ngelanggar hak sida milih jalai pengarap kediri empu.
“Belajarka Bahasa Arab nya enda praktikal ba nembiak Dayak ukai Islam di Sarawak, lalu aku nanggi raban bekuasa mantaika statistik data ti mandangka belaju Bahasa Arab nya meri penguntung ngagai nembiak Dayak ukai Islam ba bidang akademik enggau ekonomi,”ku iya.