ANANG BEJUDIKA PENGIDUP DIRI: Romeo (tengah) disempulangka Tuai Rumah Rami (empat kiba) maya pengawa miring lalu Ding (dua kiba), Wong (tiga kiba) sereta raban ke bukai ngemataka pengawa nya.
Anang bejudika pengidup diri lebuh milih pengari rayat maya pengawa bepilih tu ila
SIBU: Peranak menua pesisir dilalau ngambika enda bejudika pengidup diri tauka salah pilih maya pengawa bepilih nengeri (PRN) ti deka datai tu ila.
Sekretari Politik Kepala Menteri, Romeo Christopher madah, pengudah pengawa bepilih nya mayuh bengkah pengawa pemansang dibatak pulai ketegal penuduk konstituens sereta parlimen dipegai penyakal.
“Dalam timpuh nya, semua kandang menua ti di baruh penyakal nadai diungkupka sebarang agih belanja.
“Sukung mih Barisan Nasional (BN) dalam pengawa bepilih tu ila,” ku iya ngelalau peranak menua pesisir rambau bejadika pengerami Ngiling Tikai di Rumah Rami Sandai, Sungai Stumau di Meradong kena Hari Enam tu tadi.
Bela bisi datai ngulu pengerami nya Ketuai BN Sarikei, Ding Kuong Hiing, pengari Kaban Kunsil Nengeri (ADUN) Semop, Sanlos Selamat, Managing Direktor Sungai Servis Ferri Sian James Wong sereta Chairman Serakup Raban Tuai Rumah Meradong (PTR) Tuai Rumah Rantie Ayai.
Romeo udah nya bisi nangkan raban nembiak di menua pesisir ti udah manggai umur ti chukup endur ngerijista diri nyadi pengudi.
Berebak enggau pengerami nya, Sanlos bisi nyuaka bantu ari ADUN Semop, Abdullah Saidol penyampau RM14,000 ngagai tujuh buah rumah panjai ngelingi menua nya.
Kunsil Pelilih Meradong Julau mega bisi nyuaka bantu penyampau RM15,000 dikena bejalaika pengawa ngemanahka jalai seraya Wong nyuaka pemeri ari kuchik iya empu penyampau RM10,000 ngagai PTR Meradong sereta RM1,000 ngagai Rumah Rami.