Peranak ngelingi San Demam ditesau sampal datai ngagai Kem Pengerai Impian Sarawak DAP

0

KUCHING: Kem Pengerai Impian Sarawak deka ngaduka pengawa meresa pengerai dua hari berunggu di Rumah Panjai San Demam Sri Aman, berengkah sehari tu (Hari Enam) enggau Hari Minggu.

Berindik enggau nya Chairman Parti Tindakan Demokratik Sarawak (DAP) pampang Sri Aman, Leon Jimat Donald meransang semua orang ke diau ngelingi datai beperesa pengerai tubuh diri.

Ku iya, servis meresa pengerai nyengkaum meri enggau nadai bebayar deka dipejalaika lapan iku lutur pakar enggau dua iku lutur ngeli.

“Anang muai peluang meresa pengerai tubuh diri ba lutur pakar ke dibai kami maya dua hari nya ila.

“Semua servis nyengkaum ubat deka diberi enggau enda bebayar lalu kita ke diau ngelingi dikelaluka datai,’ku Leon ke mega Mandal Chairman DAP Nengeri.

Iya madah, pengawa nya deka berengkah pukul 4.00 lemai ngagai pukul 8.00 malam kena 4 Julai (Hari enam), ke alai ba hari kedua iya nya 5 Julai, pengawa beperesa deka berengkah pukul 10 pagi nyentuk 8 malam.