NGEMAH: Sepenyampau RM372,000 udah diungkup dikena ngaga baru Rh Meruang ti dituntung penusah angus kena 7 Jun tu tadi.
Ari penyampau nya, RM72,000 diberi nengah Projek Mit Pemansang Menua Pesisir ari Kaban Kunsil Nengeri (ADUN) Ngemah, Alexander Vincent lalu RM300,000 agi ari belanja projek tranformasyan menua pesisir.
Nengah belanja ti dikemisi ku Alexander, pengawa ngaga baru rumah panjai nya deka dipejalaika enggau naka pengelengkas ngambika taun baru ila, peranak Rh Meruang 36 pintu ba Palan Pengentap Berumah Baru Ng Tada, bisi rumah panjai baru.
“Kami dipelaba deka beguna belanja ke mayuh agi tang kami bedau berandau enggau peranak rumah panjai nya sentang langkar rumah panjai baru. Nengah pemisi ti dikembuan kami diatu, kami tau berengkah bejalaika projek nya nengah pengawa nyungkur sereta meresi palan nya. Enti kami ngasaika belanja nya enda chukup,kami tau minta bantu ari Opis Pemansang Menua Pesisir enggau Kandang Menua,” ku Alexander madah ngagai BAT V empai lama ke udah.
Ku iya, palan baru endur ngaga rumah panjai nya endang udah bisi.
“Pengudah penusah nya nyadi, mayuh bengkah bantu udah diterima baka mata duit, pemakai enggau gari ti beungkus urung RM300,000 nengah sekeda ejensi perintah, NGO enggau parti politik.”
“Dua minggu pengudah angus, bekau angus nya nya diberesi lalu diatu peranak rumah panjai nya udah berengkah ngaga dampa ba palan lama seraya nganti rumah panjai baru digaga.”
Alexander ti mega ba renggat keterubah nyadi pengari rayat sitak nya deka nentuka peranak rumah panjai ti tasah nya dikemataka perintah. Iya mega deka nentuka belanja ti dikena ngaga projek nya chukup.
Berebak enggau nya, tuai rumah panjai Meruang, Meruang Umang, 80, madah 36 buah ruang bilik ti tasah nya diatu ngenduh ba temawai rumah panjai lama laban nadai endur bukai.
“Ba rumah panjai kami suba bisi awak entara rumah panjai enggau dapur kami. Api nya enda nyerarai ngagai dapur kami. Diatu, kami ngenduh ba dapur lalu langkau sementara mega bisi didirika,” ku Meruang ti udah nyadi Tuai Rumah panjai nya ngelama 20 taun.
Ku iya, pengerugi ketegal penusah angus nya ngelui RM100,000 laban nadai siti pan reta ulih diselamat ari rumah ke angus nya.
“Rumah panjai kami sebagi nya udah disemin lalu sebagi agi mengkang kayu, lalu semina setengah jam aja abis retung laban api.”
Enti nitihka adat Iban, nyadi sebengkah pemali enti nirika rumah baru ba endur ke sama, nya alai sida ngiga palan baru. Diatu peranak rumah panjai nya sama bela setuju enggau sebuah tanah puang di belakang sebuah klinik ba palan nya.
Ku Meruang pengudah penusah nya nyadi, bantu ari mensia mayuh udah nyaup ngelempungka tating pengidup sida.
“Kami amat tusah ati. Lebuh penusah nya nyadi, kami mengkang ngintu Gawai. Taja pia, kami meri terima kasih ngagai orang ti udah mantu kami nengah mayuh macham chara.
“Pengari rayat kami, Alexander udah besemaya deka ngaga rumah panjai baru ke kami. Iya endang suah mantu lalu aku pechaya kami bisi rumah pan-jai baru enda lama agi.”