TEMBU PENGAWA KITAI: Temuai ke bisi datai (ari kiba) Father David Ho, Father Mathius, Michael, Jolamp sereta David Chuo (kanan) besaup ngiling tikai maya atur pengawa nya ditu.
KAPIT: Gerija Roman Katolik St. Mary ditu, udah mujur ngatur tiga bengkah pengerami beserumpu di balai gerija nya apin lama ti udah.
Bejaku maya pengawa beserumpu parish nya, Father Mathius Olili madah, pengerami sehari nya diatur kena meri berekat ngagai pemindah Father David Ho ti ningalka Parish Kapit, ngintu pengerami Ngiling Bidai dikena ngelai nutup pengerami Gawai Dayak taun tu sereta dikena meri berekat seiku ‘church’s communion minister’, Jessica Jolamp ke dipindahka ke Bau. Iya nyadi pengajar di Sekula Primari (SK) Sungai Amang.
Iya meri besai terima kasih ngagai Father David Ho ke pemanah iya sekumbang bejalaika pengawa ke gerija nya. Iya mega meri selamat ngagai church’s communion minister sereta commentator Jessica Jolamp ngagai pemanah pengawa iya ke gerija ngelama tu.
Berebak enggau nya, iya mega ngayanka diri beterima kasih ngagai semua sukung ari raban gerija ti datai ngulu sereta ngemujurka pengerami serumpu nya sereta awak ti dipekunsi maya pengawa begulai manduk pemakai sehari nya.
Father Mathius nampung, iya deka pemisi taun tu berengkah pun bulan Julai tu nyentuk 29 Ogos “Aku deka pemisi dalam pengelama dua bulan. Ke bendar iya, aku pemisi sekali dalam dua taun sereta tiap taun kami diberi pemisi pengelama sebulan. Aku udah lama enda pulai nemuai ngagai kami sebilik di menua asal iya nya Kenya di Afrika dalam pengelama dua taun tu, nya alai taun tu aku ngambi peluang pulai ngabas sida,” ku iya.
Sekeda aktiviti ti bisi diatur rambau pengerami gempuru nya nyengkaum ngaga ranyai, belagu karaoke, sereta pengawa nyuaka pemeri ngagai Jessica Jolamp enggau Father David Ho ari gerija nya.
Bela bisi datai ngulu pengerami iya nya Chairman Pengatur Pengerami, Michael Lasu Nyantaw, Father David Ho, Chairman Kunsil Parish, David Chuo, Chairperson Marian Guild, Agnes Jemat, Divine Mercy sereta Raban Kunsil Parish, Mathew Lebak, Catechists Kenneth Kayan sereta Edward Antas sereta 300 iku kaban gerija ke bukai.