Mayuh pemansang diungkup kitu nengah RMK11

0
KELAI DIPENYADI: Alexander ngerat riben ngelaika penga-wa bejadika jalai semin ke baru di Rumah Austin Kilat.

KELAI DIPENYADI: Alexander ngerat riben ngelaika penga-wa bejadika jalai semin ke baru di Rumah Austin Kilat.

Pengudah PRN 2011 suba, peranak sitak Ngemah udah mayuh ngasaika ubah pemansang dibai BN

KANOWIT: Penatai raban Barisan Nasional (BN) di Ngemah ulih diasaika berindik ari penyuah pengawa bejalai ke diatur Kaban Kunsil Nengeri (ADUN) sitak Ngemah, Alexander Vincent sereta udah ngatur mayuh pengawa pemasang kandang beberapa taun ke udah.

Alexander beratika peranak menua nya ngasaika mayuh bengkah pemansang pengudah BN ngambi pulai baru penuduk nya ari penyakal rambau pengawa bepilih nengeri (PRN) 2011 suba.

“Ambi ke chunto di Nanga Ngungun bisi digaga jalai ti manah nyambung menua pesisir di kandang menua Nanga Ngemah, bungkur telekomunikasyen sereta bekal kuasa karan enggau bekal ai beresi.

“Dalam kandang dua taun ti deka datai tu, menua tu deka disambung terus ngagai mengeri besai enti Jematan Kanowit enggau Jalai Kanowit-Kapit tembu dalam taun 2017 ila,” ku iya bejaku rambau pengawa bejadika tiga bengkah pengerami di Rumah Austin Kilat di Skim Gempuru Nanga Ngungun ditu lemai ensana.

Pengerami nya nyengkaum ngintu pengerami Ngiling Bidai, makai selamat ketuai komuniti ke baru Ngemah, Pengulu Ambrose Pengiran sereta pengerami bejadika jalai semin rumah panjai nya.

Sekeda raban ti bisi datai ngulu pengerami nya, bini Alexander Susan Clement, Ketuai Indu PRS Ngemah Mutang Karani, Pengulu Ambrose Pengiran, Pengulu Ugap Seribu sereta Pengulu Ijam Tuah.

Alexander udah nya madah, di baruh Langgur Pemansang Malaysia Lumpar Ke-11 (RMK-11), batang pengawa iya deka mai mayuh agi pemansang ngagai Ngemah.

Tu ku iya, nyengkaum Jalai Nanga Ngungun-Nanga Jagau iya nya deka nyediaka jalai ngagai urung 2,000 peranak rumah panjai di Skim Gempuru Nanga Jagau sereta sekeda raban orang ke diau mendam nebing Ulu Sungai Ngemah.

“Aku pechaya Ngemah deka nerima mayuh agi agih belanja di baruh RMK-11 ungkup pengawa pemansang,” ku iya.

Nyempulang pengerami nya, iya bisi ngemendarka projek di baruh ‘Basic Infrastructure Project’ (PIAS) ngagai 11 buah rumah panjai iya nya nyengkaum ngemanahka jalai semin sereta nukar batang paip ai tu udah lama.