Nya kelai perintah seruran ngemeratka pemansang enggau pengingin rayat di Bagi menua nya
BETONG: Ungkup belanja sepenyampau RM11.28 juta ke pemansang sereta dikena ngatur aktiviti gerempung/serakup ti berejista dalam komuniti kelai perintah endang ibuhka pemansang enggau pengingin rayat ditu.
Sapit Kepala Menteri, Datuk Patinggi Tan Sri Alfred Jabu Numpang madah, pemansang ti diasai diatu datai ari sukung ti udah pechayaka iya ngiring rayat ditu.
Ku iya, laban ti udah dipilih nyadi pengari rayat di Betong sereta dichiri nyadi menteri dalam kabinet Sarawak, nya nyadika peransang ngemajuka nengeri Sarawak enggau Bagi menua Betong.
“Kami bebendar nyendiaka perambu sereta pelin pemansang ba kandang menua Betong ngambika bisi dikena semua.
“Perintah Barisan Nasional (BN) ngelangkar pemansang ti pemadu manah ungkup menua Betong nengah pengawa muka pasar baru asil kerejasama enggau Datuk Amar Douglas Uggah Embas ngambi pulaika pengelantang rayat.
“Pemansang ti majak ngerembai dikemujurka perintah nengah chara ngaga mayuh bengkah institusyen pelajar ti mega nyadi pelasar pemansang mensia sereta muka runding rayat enggau bansa,” ku iya bejaku ba pengerami nyuaka Chek Projek Mit Pemansang Menua Pesisir (MRP) Nengeri enggau Perintah Besai, sereta ngemendarka projek infrastruktur ungkup sitak Layar ditu apin lama ke udah.
Menteri Betanam Betupi Moden ti mega Menteri Pemansang Menua Pesisir nya arap endar ati peranak menua pesisir ulih diberi pemansang ke pemadu manah belama.
“Perintah deka majak mai pemansang ti dikeinginka rayat di semua kandang menua pesisir ditu nengah akses jalai alun sechara berenggat enggau perengka guna bukai ti deka dikemansangka.
“Tetiap projek ti dibai ngagai menua pesisir ditu endang ungkup rayat lalu pengawa ngemendarka projek infrastruktur mega nyadi sebengkah chara ngambika bala ketuai ba tikas nembiak redak ulih meda pemansang nya dipejalaika.
“Nya alai bala ketuai raban bansa patut beratika tetiap projek ti diberi ngambika setipak enggau ungkus projek nya ke bendar.
“Anang nyalahka perintah enti sema ungkus ngaga nya enda setipak enggau asil ti udah tembu digaga,” ku iya.
Beserimbai enggau nya, 27 iti chek MRP Nengeri ungkup sitak Layar, 57 bengkah pemendar projek infrastruktur ungkup sitak Parlimen Betong enggau enam iti chek ke aktiviti bulan puasa ungkup surau enggau JKKK udah disua ngagai penerima.
Bela bisi datai, Menteri Kebun Dandang Besai enggau Komoditi Datuk Amar Douglas Uggah Embas, Residen Bagi Menua Betong Datu Romie Sigan Daniel,Sapit Residen Bagi Menua Betong Galong Luang, Temenggung Nunong Dandan, bala ketuai opis perintah, mensia mayuh enggau bala penerima.