Sikie berami enggau peranak rumah panjai di Ulu Kakus Ngiling Bidai

0
DIATUR NGENA ADAT: Adat basa ngelaluka penatai pengabang di Uma Peran, John Sikie dipeda manchak jani.

DIATUR NGENA ADAT: Adat basa ngelaluka penatai pengabang di Uma Peran, John Sikie dipeda manchak jani.

KAPIT: Menteri Muda ba Opis Kepala Menteri (Adat Asal enggau Pekara Bansa Penan), Datuk John Sikie Tayai ke mega Menteri Muda Perintah Lokal bisi bejalai nemuai ngagai mayuh bengkah rumah panjai di sitak menua dipegai iya apin lama ti udah.

Iya ngambi peluang pengerami Gawai tu kemari ngulu pengawa Ngiling Bidai seraya nerima timbal penemu ari peranak menua ba renggat baruh sereta nerang ngagai sida pasal polisi perintah sereta program pemansang.

Sekeda rumah panjai ti bisi digusung iya nya Uma Paren, Ulu Kakus, rumah panjai raban bansa Penan.

Bela bisi nyempulang penemuai iya iya nya Pemesai Opis Pelilih Mit Tatau, Nyura ti nguluka opis perintah sereta bisi 15 iku raban tuai rumah ari rumah panjai ti semak endur nya.

Rambau pengerami nya, John Sikie ngelalau peranak menua nya neruska pengawa sida nyukung perintah di baruh pegai Kepala Menteri, Tan Sri Datuk Amar Adenan Satem ti nyadi ketuai ngagai semua peranak Sarawak. Ku iya, Adenan Satem kenyau iya dipadu nyadi Kepala Menteri iya udah ngadaka mayuh raban ti beorientasyenka polisi ti meri penguntung ngagai semua orang di nengeri tu.

“Iya ngemeratka pengawa pemansang di menua pesisir ti deka nguntungka kitai ti diau di menua pesisir laban kitai beguna bendarka projek pemansang dikena ngemanahka tikas pengidup kitai. Anang jampat mendingka semaya politik ti diberi raban penyakal iya ke semina nemu nagang perintah bejalaika pengawa pemansang dikena ngemanahka pengidup rayat,” ku John Sikie.

Nyempulang pengerami nya mega, iya bisi nyuaka geran Projek Pemansang Mit Menua Pesisir (MRP) ngagai Uma Peran.