Tikas kemarau bedau ngemingungka kitai: Jabu

0

Dikarang Rengenyan Labang//

 

BEDAU NGEMINGUNGKA KITAI: Jabu (tengah) disempulang Fatimah (kiba) enggau Misnu (kanan) dalam aum pengarang berita bekaul enggau chara nengeri nyikap diri napi  kemarau 2015.

BEDAU NGEMINGUNGKA KITAI: Jabu (tengah) disempulang Fatimah (kiba) enggau Misnu (kanan) dalam aum pengarang berita bekaul enggau chara nengeri nyikap diri napi kemarau 2015.

KUCHING: Taja pan nengeri tu berengkah napi kemarau sereta besebun tang pengawa ngaga benih ujan bedau datai ba pematut dipejalai tang udah nyikap napi sebarang penyadi ti enda disadang.

Perkara nya dipansutka Sapit Kepala Menteri ti mega Chairman Komiti Pengatur Penusah Ngenyit Negeri Sarawak (JPBNS) Datuk Patinggi Tan Sri Alfred Jabu Numpang dalam aum pengarang berita, kemari.

“Taja pan di Sarawak kenyau berapa hari tu nadai ujan sereta berengkah besebun, tang naka ke diatu nadai kelai pengawa ti ngasuh kitai berumban ngaga benih ujan.

“Tang enti sema patut dipejalaika, kitai minta soldadu langit (TUDM), Opis Pengemata Gaya Hari (JMM) enggau ejensi bukai ke endang udah ngadang bejalaika pengawa sereta ngaga benih ujan, tang ke diatu bedau datai ba tikas ke ngirauka kitai.

“Diatu di serata Sarawak udah berapa hari nadai ujan tang dipelabaka dalam timpuh dua ngagai tiga bulan (Julai, Ogos enggau September) ti deka datai gaya hari enda ngemalat (kemarau) sebedau tu, bisi ujan tang enda balat,” ku iya.

Dulu ari nya Jabu nyadi chairman aum JPBN Negeri Sarawak Bil2/2015 dikena betapi enggau musim kemarau 2015 di nengeri Sarawak, ke diatur ba Tingkat 3 Kunsil Nengeri ditu, kemari.

Bepelasarka penerang berita JPBN Nengeri Sarawak kemari, JMM meri penerang madahka Malaysia betapi enggau musim kemarau lebih agi di Nengeri Sarawak sereta nengeri pantai barat Semanjung Malaysia ti enda nyengkaum Perlis, Kedah enggau Pulau Pinang berengkah 19 Mei tu tadi ngagai bulan September 2015.

Dalam timpuh nya menua deka betapi enggau musim kemarau berindik ari penyadi Monsun Barat Daya ke alai bisi penambah penyampau titik angat lalu tau ngujungka hari besebun.

Gaya hari di Sarawak dipelabaka kemarau lebih agi di bagi menua barat enggau utara Negeri Sarawak.

Nengeri Sarawak dipelaba deka nerima penyampau ujan ti mimit dibaruh normal penyampau ujan tiap bulan iya nya entara dalam julat 150mm ngagai 300mm.

Berindik ari pekara nya iya madahka ejensi enggau opis perintah ti bekaul baka Opis Ai Kuching (LAK) enggau Jabatan Kerja Raya (JKR) udah dipinta nyendiaka pelin ti ngelui ari ke dipelabaka nyema penusah suntuk bekal ai nyadi.

Nambahka nya JMM, Opis Rampa Menua (JAS) enggau Opis Pengeraja Asal enggau Rampa Menua (NREB) mega dipinta sama matau pekara ti nyadi ketegal gaya hari ti kemarau.

“JKR, Opis Pengintu Pengelantang Pendiau Raban Bansa (JKM) enggau piak bukai ti bekaul sereta semua bagi menua di nengeri tu udah besedia enggau Prosedur Operasyen Standard (SOP) lebih agi nyerumba Hari Raya ti deka disambut 10 hari ke deka datai.

“Dalam timpuh tu (kemarau) komiti kitai deka lebih ngemeratka kandang endur ti betapi enggau suntuk ai, lalu ngagai kandang endur ti nadai disambung jalai alun sida JKM, opis Residen sereta JKR deka nambahka penyampau kotak ai mineral ari empat (4) kotak ngagai 10 kotak ke sebuah ruang bilik, maya pengerami Hari Raya tu ila,” ku iya.

Lebuh ti ngenang bekal ai di mengeri Kuching iya madahka, bepelasarka peneleba Opis Ai Kuching (LAK) dalam timpuh dua minggu hari enda ujan, ai ke ditakung ba loji ai Batu Kitang ulih tetangkupka peminta guna orang mayuh dalam timpuh nya.

“Bulan Januari taun baru (2016) Tekat Ai Bengoh ulih berengkah ditakung sereta dikena, nya alai kitai di mengeri Kuching nadai agi pengirau suntuk ai udah nya ila,” ku iya.

Sama bisi dalam aum pengarang berita nya kemari, Menteri Pengintu Pengelantang Pendiau, Orang Indu enggau Pemansang Ruang Bilik Datuk Fatimah Abdullah enggau Sapit Sekretari Perintah Nengeri Datu Misnu Taha.