Pulaika kuasa autonomi pelajar ngagai Sarawak

0

MIRI: Parti Sa’ati Rakyat Sarawak (SUPP) enggau rayat nengeri tu minta Sarawak diberi kuasa autonomi dalam bidang enggau sistem pelajar sereta bisi opis menteri kediri empu ba tikas nengeri.

SUPP madah, raban ti bekuasa dalam pelajar ba tikas perintah besai enda ulih mutarka pekara pelajar di nengeri tu ngena kuasa ‘dikemata ari jauh’.

“Kitai di Sarawak nemu agi isu ti bekaul enggau sistem pelajar di nengeri kitai empu sereta ulih ngaduka polisi pelajar ke manah agi, dibanding enggau ti pejalaika Perintah Besai diatu,” ku Sekreteri Besai SUPP, Datuk Sebastian Ting.

Iya bejaku munyi tu lebuh ngenang pasal pengawa Opis Menteri Pelajar Malaysia ti ‘bechiping’ enggau Prinsipal Sekolah Menengah Kebangsaan (SMK) Lutong, Marcus Hugo ti mindahka iya ngagai sekula bukai taja pan nyau deka pinchin.

Ku Sebastian, lebuh ninga Marcus dipindah ngagai sebuah sekula sekondari bukai, iya berasai enda lantang ati enggau pemutus ti dianggap iya enda masuk akal, ke lebih agi mayuh orang ngumbai nya bekaul enggau isu ti nuntung Sabrina kena bulan Mac taun tu, ti ngujungka dua iku pengajar ke ditemu salah nya dipindah ke Semenanjung Malaysia.

“Kitai arapka pengawa mindahka iya ukai ‘malas dendam’ ketegal kes ti nyadi ba Sabrina, laban rayat pechaya raban bekuasa pelajar di Sarawak enda ngaga ulah ti dianggap enda patut sereta bechiping ngagai SUPP.

“Nya alai, mulaika bidang kuasa autonomi pelajar ngagai perintah Nengeri Sarawak nyadi pekara ti pemadu dikemeratka parti diatu,” ku iya.

Ku Sebastian, iya dipadahka Marcus ke alai surat minta iya pindah ngagai sekula bukai kena 25 Mei 2015 ari Opis Menteri Pelajar di Kuala Lumpur sereta ngeripot diri di sekula baru kena 15 Jun tu tadi.

Taja pia, surat nya dianjung dulu ngagai Opis Pelajar di Kuching sebedau dianjung ngagai iya ngena chara pos ke diterima iya kena 2 Julai tu tadi.

Ku Marcus, iya udah minta pinchin tumu lalu enti dikemendar, iya deka pinchin kena bulan Disember 2016.

Berebak enggau nya, PIGB SMK Lutong mega bisi nganjung  surat apil ngagai Opis Menteri Pelajar di Kuala Lumpur enggau Opis Pelajar di Kuching ke minta Marcus ditanka nyadi prinsipal di sekula nya nyentuk ke iya pinchin.

Bela bekunsi pekara ke sama Serakup Dayak Sarawak (PEDAS) ti minta autonomi pelajar Sarawak dipulai ngagai nengeri tu.

PEDAS, ba sebengkah penerang berita nanya nama kebuah Opis Menteri Pelajar mindahka Marcus ngagai sebuah sekula sekondari bukai di Miri, tang ukai nikika pangkat iya.

Presiden PEDAS, Mejar (B) Kapten Collin Imran madah, enti nitihka pemujur pengawa dikereja prinsipal nya, iya  patut ditanka dia sereta tau ditikika pangkat laban iya mega seiku ari beberapa iku ti tau dichiri nyadi Direktor Opis Pelajar Nengeri.

“Nya mih kebuah kitai enda tau enda minta pulai autonomi pelajar kitai, laban perintah besai seruran bisi kebuah ‘ngemba’ kelimpah ari enda ngaku utai ti dikereja sida.

“Kelalu nampak bala intelektual Dayak ti bisi pengelandik suah diseliah kenyau ari kelia, pekara ti baka tu deka nyadi belama enti nadai orang berani bejakuka nya,” ku Collin.

Berebak enggau nya, PEDAS ti ngembuan lebih 4,000 iku di serata nengeri minta penerang ari Opis Menteri Pelajar bekaul enggau perintah mindahka Marcus.