Dikarang Jacqueline David //
UNGKUP PEKEBUN MIT: BKKH Nengeri Sarawak nerima RM37,307,000 ti diarika Jabu kena mayar insentif RM500 ngagai pekebun mit getah.
KUCHING: Sebengkah komiti ti betuaika Menteri Industri Kebun Bedandang Besai enggau Komoditi Datuk Amar Douglas Uggah deka ditumbuh dikena nyungkak produktiviti enggau penatai pemisi pekebun getah di serata menua tu.
Bala kaban komiti nya nyengkaum Shafie empu, ba Opis Menteri Besai, Senator Datuk Seri Idris Jala, Menteri Kuasa, Ai, enggau Teknologi Gadung Datuk Seri Panglima Dr. Maximus Ongkili.
Ku iya, langkar mekanisme nya nyengkaum ngaga kilang ti bepalan di menua pesisir, mantaika program dagang ba mayuh bengkah bidang sereta nentuka bantu enggau sukung diberi belama ngagai pekebun mit.
Bisi sekeda nya minta kitai ngaga sistem kilang digaga ba kebun getah nya, perengka pengangkut pan enda tau enda bisi disediaka ngambika ulih dikena nyadi perengka guna ba industri kebun getah tu.
“Kitai meda dulu bakani kitai ulih ngemanahka sistem tu. Kitai meda bakani sistem tu bantu tauka ulih nambah penatai pemisi pekebun mit getah enti dikemanahka agi ari ke diatu,” ku Shafie.
Iya madah munyi tu ba aum media pengudah bejadika atur pengawa nyuaka BKKH 2.0 Renggat Menua Sarawak (renggat ke penudi) ngagai 600 iku pekebun mit getah ti nerima RM500 seiku di Dewan Mayuhguna Kompleks Nembiak, Lumba enggau Main ditu,ensanus.
Rega getah SMR20 (1 kg) diatu, RM5.38 dibanding enggau rega ke pemadu tinggi dalam taun 2011, RM17.17 sekilogram.
Tu nyadi sebengkah chara dikena ngurangka penusah pekebun getah ke lebih agi pekebun mit ke betapi enggau rega getah ke enda menuku.
Kelimpah ari nya, Shafie madahka kerejasama entara opis Menteri Pemansang Menua Pesisir enggau Opis Menteri Pengawa Betanam Betupi Moden ti betuaika Datuk Patinggi Tan Sri Alfred Jabu enggau RISDA sereta Opis Betanam Betupi Sarawak kenyau ari kelia udah ngembing bala pekebun ukai semina nengah penemu sereta nambahka produktiviti tang mega deka nyungkaka penatai pemisi sida.
Ku iya, bala pekebun mit ukai semina diberi penemu ba pekara ngemansang kebun getah sida aja, tang sida iya mega diberi latih dalam pengawa dagang, ngambika ulih nyadi pemisi bukai sida iya.
“Kitai deka beratika produktiviti getah ulih ditambah belama ngambika ulih nambahka belanja sida,” ku iya.
Kelimpah ari nya, bala anak pekebun getah mega diperansang belajar pandai ngambika sida iya bulih sekularsip ukai semina belajar di menua luar tang dalam menua tu mega.
Naka ke diatu ku iya, MARA enggau RISDA bisi nyendiaka sekularsip ke bala anak pekebun mit ari kededua buah opis tu.
Kenyau ari taun 2013 nyentuk ke diatu, perintah udah ngemendar sereta mayar ‘Bantuan Khas Kejatuhan Harga Getah’ RM352.24 juta ke alai RM500 ‘one-off’ ngagai urung 624,146 pekebun mit enggau 80,341 (penangkal getah) ti betapi enggau pemar ketegal rega getah ti balat endar nurun di markit diatu.
Sama bisi ngulu atur pengawa nya, Sapit Kepala Menteri ti mega nyadi Menteri Pengawa Betanam Betupi Moden sereta Menteri Pemansang Menua Pesisir, Datuk Patinggi Tan Sri Alfred Jabu, Sapit Menteri Pemansang Menua Pesisir enggau Kandang Menua, Datuk Alexander Nanta Linggi enggau Menteri Muda Pemansang Komuniti Datuk Peter Nansian anak Ngusie, Kepala Direktor RISDA Dato Sri Wan Mohamad Zuki Mohamad enggau Direktor RISDA Sarawak Zulkefli Zaini.