Anang lembau ngerijista anak OKU, ku Fatimah

0

Dikarang Rengenyan Labang//

 

BISI PELUANG ENGGAU RUANG UNGKUP OKU: Fatimah disempulang Saidatul (kiba) enggau Nadhirah (kanan) madah, OKU bisi peluang enggau ruang ngasaika penyulut enggau pemujur nyentuk ba renggat antarabansa nyengkaum nengah Special Olympics.

BISI PELUANG ENGGAU RUANG UNGKUP OKU: Fatimah disempulang Saidatul (kiba) enggau Nadhirah (kanan) madah, OKU bisi peluang enggau ruang ngasaika penyulut enggau pemujur nyentuk ba renggat antarabansa nyengkaum nengah Special Olympics.

KUCHING: Apai indai ke bisi anak nyelai pendiau (OKU) diperansang ngerijista anak sida nyadi kaban tauka atlet Special Olympics Sarawak, ngambika tau ngasai peluang enggau ruang ti bisi disediaka perintah.

Menteri Pengintu Pengelantang Pendiau, Orang Indu enggau Pemansang Ruang Bilik Datuk Fatimah Abdullah madahka, ke diatu penyampau OKU nengeri tu ti berejista nyadi atlet Special Olympics Sarawak bedau datai ba tikas ti tau dikemegah.

Ku iya, Special Olympics Sarawak bisi empat buah pampang iya nya Kuching urung 200 iku atlet, Sibu (200), Pampang Miri enggau Bintulu bedau nerima mayuh kaban.

“Dulu suba apai indai engka bisi berasai malu ngembuan anak OKU tang diatu jauh udah berubah, mayuh ruang disediaka perintah ti meri peluang ngagai nembiak tu (OKU) bulih pelajar enggau penguntung bukai.

“Bekaul enggau pengawa ngerijister nyadi atlet Special Olympics ke diatu bedau mayuh, pelaba aku lebih mayuh dirijista enggau Pusat Pemulihan Dalam Komoditi (PDK).

“Nya alai kami meransang apai indai ngeriejista anak OKU enggau Special Oliympics tu sekalika enggau Kuching Chapter, Sibu, Miri tauka Bintulu Chapter.

“Kebuah kami ngansak OKU tu dirijista enggau Special Olympics ngambika ukai semina ulih bepeluang mujur ngarika menua dalam lumba enggau main nyentuk ba renggat antarabansa, tang mega ulih ngasaika servis bukai baka meresa pengerai nadai bebayar nyengkaum beperesa mata, pending enggau ke bukai nengah program pengerai atlet,” ku iya.

Fatimah mansutka pekara nya lebuh dirandau raban pengarang berita ba Padang Bilun Antarabansa Kuching (LAK) ditu kemari, maya ti nganjung dua iku atlet enggau dua iku pengiring Special Olympics Sarawak ti ngarika Malaysia ngambi bagi dalam 2015 Special Olympics World Games di Los Angeles, USA.

“Ke bendar tuju Special Olympics tu iya nya nguji runding raban atlet tu. Tebal agi nyadi atlet Special Olympics baka sida ti bisi Penanggul Belajar, Autism enggau Down Sindrom ti beumur 9 ngagai 45 taun,” ku iya.

Iya mega madah, OKU ti dirijista enggau enda ngira gerempung nyengkaum Special Olympics Sarawak mega deka ngasaika pengidup menyana nengah perengka guna ti bisi disediaka perintah enggau pengelantang ti disediaka gerempung.

Berebak enggau tu Fatimah ti nyadi Presiden Special Olympics Sarawak meransang mayuh agi gerempung korporat enggau gerempung ukai dikuasa perintah mantu Special Olympic Sarawak awakka mayuh agi peluang atlet tu datai ba renggat antarabansa ngarika nengeri enggau menua.

Iya mega meransang peranak nengeri tu nyadi orang gawa nadai begaji ti nyaga enggau ngiring OKU dalam Special Olympics.

Kemari, Fatimah nganjung dua iku atlet ari Kuching Chapter iya nya Sharifah Saidatul Nuramina Awangku Abdul Malik ti ngambi bagi dalam lumba 800 meter enggau 1,500 meter sereta Nur Nadhirah Syamsol ngambi lumba 100 meter enggau 200 meter ngagai LAK.

Nyempulang Saidatul enggau Nadhirah kemari, Chairperson Special Olympics Sarawak Kuching Chapter Datin Dayang Mariani Abang Zain enggau jurulatih Ruhana Bujang.