KUCHING: Presiden Sarawak Workers Party (SWP) Larry Sng bebendar nyakal perambu deka ngaga Tekat Ai Pelagus enggau tekat ai bukai ti dipelin perintah menua Malaysia.
Sarawak diatu udah bisi dua buah tekat ai ke besai, iya tekat ai Murum ti baru tembu digaga ke ngeluarka kuasa 944 Megawatt enggau tekat ai ti nyadi kontroversi, tekat ai Bakun ke tembu digaga dalam taun 2011.
Perintah mengkang merambu deka ngaga pemadu kurang 10 buah tekat ai nyengkaum ti udah diperambu baka tekat ai Pelagus enggau Balleh, ke alai Ketuai eksekutif Sarawak Energy Berhad (SEB),Datuk Torstein Dale Sjotveit empai lama madahka pengawa nya dipejalaika laban tiga ari lapan bengkah batang pengawa dia udah keluarka ditinda.
Diatu perintah udah datai ba renggat nyendiaka diri deka nambahka projek tekat ai, ku Larry madah ngagai The Borneo Post empai lama ti udah ke alai perintah merambu deka ngaga mayuh hidro elekterik ukai ketegal nya ulih ngenegapka ekonomi laban peminta ngagai kuasa nya mengkang mimit.
“Tekat ai Bakun ulih ngemansutka 2400 megawatt kuasa karan ti nitihka perambu asal endang deka diungkupka ngaga menua Semenanjung Malaysia nengah kabel ari baruh tasik, tang perambu nya enda nyadi,” ku Larry.
“Diatu, kitai udah chukup kuasa karan nengah penembu pengawa ngaga tekat ai Bakun enggau Murum sereta enda begunaka mayuh agi tekat ai.”
Larry ti kala nyadi Kaban Kunsil Nengeri Pelagus madah, tebal agi peranak ti diau ba kandang menua Pelagus ke dikerandau iya enda nyukung pengawa ngaga tekat ai Pelagus.
“ Peranak menua nya ti tebal agi ngemeranka pengawa betanam betupi nadai ngarapka ulih ngubah chara pengidup enggau rampa menua ti ngelingi sida laban enggai dipindah ngagai palan pengentap baru.” ku Larry.
Larry mega pechaya ketuai politik ti dipadahka pasal projek Pelagus ke lalu takut mantaika penemu sida ketegal penuduk ba politik.
Ku iya, Bagi menua Kapit division diatu udah bisi dua buah tekat hidro elekterik, iya nya Bakun enggau Murum Dam. Nengah pengawa ngaga tekat ai Baleh enggau Pelagus jemah ila, Bagi menua Kapit jemah ila deka bisi empat buah tekat ai.
“Pengawa ngaga tekat ai nya ukai semina deka ngemunaska biodiversiti enggau ekosistem di Sarawak sereta mega nadai nguntungka rayat ba kandang menua nya,” ku iya.
“Menua enda begunaka tekat ai ngemayuh nya.”