KE PENGINGAT: TRJadam (dua kiba) nyauka tepa ngagai Gramong seraya dikemataka sida bukai (ari kanan) Ambrose, Jabang, Susan enggau Alexander maya atur pengawa nya.
Dalam nenama pengawa, seseiku kitai mensia patut belalauka pemanah ulah kena nyapai pemujur
Dikarang Conny Banji //
KANOWIT: Ex-pengajar Jadam Batok mulaika kenang lebuh begulai baru enggau ex-pengajar iya empu iya ke diatu mangku pengawa nyadi Menteri Muda.
Menteri Muda Pemansang Tanah, Datuk Gramong Juna kala mangku pengawa nyadi pengajar sentara ngajar subjek Sejarah di Sekula Sekondari (SMK) Sedaya ditu dalam taun 1969 suba.
Jadam, 61, ke ngembuan Bachelor Degree ba Teaching English as Second Language (TESL) rambau nya agi belajar ba pom dua.
Iya baru udah pinchin dalam bulan September taun nyin kemari sereta diatu nyadi tuai rumah megai 12 pintu rumah panjai di Skim Gempuru Nanga Ngungun.
Ensana (Hari Enam), iya ngatur pengerami dikena meri basa ngagai Gramong ke agi dikangauka iya ‘cikgu’.
“Enti ukai ketegal nuan ‘cikgu’, aku enda nyadi orang ke menyana baka aku diatu.”
“Aku seruran beterima kasih ngagai pelajar ti diberi nuan ngagai kami,” ku iya rambau Pengerami Pemesai Begulai enggau Rayat sereta pengerami Ngiling Bidai diatur di rumah panjai nya.
Gramong dalam jaku dibantaika iya madah, iya benung belajar ba Universiti Malaya lebuh iya dikangau nyadi pengajar sentara di sekula nya.
Dalam kenang iya, iya ngena rutan nyaga disiplin nembiak.
“Ba aku, disiplin nya nyadi kunchi pemujur. Enti nadai disiplin, kitai enda teulihka pemujur dalam pengidup,” ku iya.
Sekeda orang ke bisi datai ngulu pengerami tu iya nya Kaban Kunsil Nengeri (ADUN) Ngemah Alexander Vincent, bini iya, Susan Clement, Pemesai Pengereja Pengawa Opis Pelilih Mit Kanowit Jabang Juntan, lima iku pengulu iya nya Ugap Seribu, Ambrose Pengiran, Ugak Sigai, Ijam Tuah enggau Juin Adan sereta Kapitan Kong Sien Yien.
Gramong ke mega ADUN Machan udah nya madah, Jadam mengkang ulih bejalaika servis ngagai komuniti lebuh iya nawar diri nyadi tuai rumah nganti niang Tuai Rumah Mambang.
Iya ngarapka Jadam ulih nguna peneleba 38 taun iya dalam bidang pelajar dalam pengawa ke baru dipangku iya.
Berebak enggau nya, SMK Sedaya, diatu udah dipindahka ngagai palan ke baru sekeda ari sekula ke pemadu tuai di nengeri tu.
Dulu suba, sekula tu dikelala ngena nama Sekula Pemansang Menua Pesisir Kanowit lebuh keterubah iya ditumbuh dalam taun 1957 nyediaka palan pengawa matih bidang betanam betupi ngagai raban nembiak Bumiputera.
Sekula tu dipenyadi sereta dibuka kena 26 April 1958 ulih Residen Pelilih Ketiga, D.C. White.
Kena 22 Jun 1971, sekula tu ditukar nama ngagai Sekolah Menengah Dato Haji Abdul Rahman Ya’kub dikena ngelaika pejalai ngabas diatur Kepala Menteri Dato Abdul Rahman Ya’kub.
Kena 5 May 1972, Kepala Menteri bisi bejalai baru ngabas sekula tu lalu merambu nama Sedaya dikena nganti nama Sekolah Menengah Dato Haji Abdul Rahman Ya’kub.
Kelimpah ari Gramong enggau Alexander, sekeda ex-nembiak SMK Sedaya ke bukai iya nya Chairman Tenaga Nasional Berhad Tan Sri Leo Moggie, Menteri Pemansang Rama Tan Sri William Mawan Ikom sereta Menteri Muda ba Opis Kepala Menteri (Promosyen Pelajar Teknikal) Datu Len Taliff Saleh.