Mayuh pendam kaban soldadu ke enda temu alai deka digiga
Dikarang Judan Bungap //
KANOWIT: Pendam raban soldadu ba sitak puak nengeri tu deka belabuh digiga tauka disidi ngambika ulih diberi basa nitihka atur ti chukup ninting taun.
Pemantu Pemesai Merintah Rejimen Renjer DiRaja Mejar Markus Philip madah, pendam sida ke digiga tu ukai semina bisi gelar Bujang Berani tang mega nyengkaum semua ti kala nyadi soldadu.
“Agi mayuh pendam alai raban soldadu ba nengeri tu empai ditemu endur.
“Nya alai, udah tu ila kitai deka bejalai ngiga pendam raban soldadu baka ba Sibu, Miri, Bintulu, Kapit enggau Song.
“Kebuah pia ngambika kitai bela nemu dini alai pendam raban soldadu lalu meri basa ngagai sida ninting taun beserimbai enggau Hari Bujang Berani,” ku iya.
Pekara tu dibantaika iya maya ngulu Pengawa Ngintu Hari Bujang Berani ke diatur Gerempung Ex-Soldadu Pampang Kanowit begulai enggau Batalion Ke-3 Rejimen Ranjer Diraja (3RRD) ba pendam niang Mathew di Jalai Nibong-Tada ditu, ensana.
Dulu agi ari tu, niang apai Mathew, Medan Unying ba jaku iya madahka diri berasai lantang agi enggau pengawa ke diatur sehari nya.
Ku iya, empai lama tu tadi, rumah panjai sida ba Nibong-Tada dituntung penusah angus.
“Taja ditinggang penusah baka tu tang sehari tu (ensana) aku berasai lantang ati laban pengawa ngintu Hari Bujang Berani ulih diatur ba pendam niang anak aku,” pia ku iya madah.
Pengawa nya bela digulu Kaban Kunsil Nengeri (ADUN) Ngemah Alexander Vincent, Chairman Gerempung Ex-Soldadu Pampang Kanowit Kaunsilor Luang Barieng, indai niang Matthew, Landun Ngumbang, bala kaunsilor, bala penghulu enggau lebih 100 iku bala kebukai.