Raban bansa bumiputera enda tau ngembuan ulah kelalu amu deka bulih duit laban nya tau ngerugi diri empu
SARIKEI: Menteri Muda ba Opis Kepala Menteri (Promosyen Pelajar Teknikal) enggau Menteri Muda Rampa Menua, Datu Len Talif Salleh ngelalau raban bansa bumiputera di nengeri tu ngambika anang nyual tauka ngadai tanah sida.
Kenu ku iya, ulah kelalu amu deka bulih duit nengah chara baka nya tau ngerugi diri empu sereta ngagai bala anak serak rebak dudi.
“Anang ngaga jalai puntang nengah chara ngadai tanah dikena mutarka penyuntuk belanja.
“Tanah nya reta ke pemadu berega lalu tau meri penguntung besai nyema iya dikena ngaduka pemansang baka alai bekebun tauka pengawa bukai.
“Nya alai, kitai minta mensia mayuh anang enda bebendar ngemansangka tanah diri lalu anang ngelakka tanah nya puang nadai dikemansang.
“Perundingka chara ngambika iya ulih ngemansutka asil nengah tanah nya, sekalika nya jampat tauka laun,” ku iya.
Iya madah munyi nya rambau Pengawa Nyuaka Surat Komunal Bumiputera Seksyen 6 Kanun Tanah Negeri enggau Lesen Ngentap Sentara (TOL) Ungkup Pengawa Nyungkur Taba Kampung Tanjung Bundong Bintangor enggau Kampung Susur Jambu Sarikei sereta Pengerami ‘Ramah Tamah Aidilfitri’ Opis Tanah enggau Survei Sarikei, kemari.
Ba pengerami nya, kira 160 TOL udah disua ngagai peranak ari dua tumpuk pendiau Kampung Tanjung Bundong Bintangor enggau Kampung Susur Jambu Sarikei.
Kelimpah ari nya, bisi 16 warta Sekyen 6 Kanun Tanah Negeri bela disua ngagai 14 buah rumah panjai enggau sebuah komuniti Melayu Kampung Selemas Bintangor sereta sebuah komuniti Melanau Kampung Selalang.
Kenu ku Len, pengawa tu mandangka pemendar perintah dikena nentuka rayat di nengeri tu ngempu tanah nitihka pematut.
“Ngenang pekara bukai, perintah chukup ngemeratka pengawa mantu rayat ke kurang penatai pemisi nengah chara mantu sida.
“Tuju perintah meri TOL dikena ngemuntangka sida nangkir rumah besai agi dudi hari.
“Nangkan nya, perintah mega mantu raban orang ke umang nengah ‘Program E-Kasih’ enggau ‘Bantu Rakyat Bina Rumah’ sereta ‘Baik-pulih’,” tegas Len.
Kaban Kunsil Nengeri (ADUN) Belawai mega ngelalau bala penerima geran tanah nya anang enda nguji ngentak rumah ba lot diri empu.
Bela bisi datai iya nya Pemesai Opis Tanah enggau Survei Sarikei, Ngu Tai Kong, Sekretari Politik Kepala Menteri, Dayang Roayah Abang Adeng, Pemesai Opis Kaunsil Meradong, Mastapa Julaihi sereta bala tuai raban bansa.