Dikarang Rengenyan Labang //
KUCHING: Raban pengereja pengawa palan perubat diperansang chakah agi ngangkatka standard tauka kualiti industri perubat di nengeri tu ngambika ulih matak mayuh agi orang (pesakit) ari menua luar berubat kitu.
Tuan Pemegai Menua (TYT) Negeri Sarawak Tun Pehin Sri Abdul Taib Mahmud madahka ari pengawa ngangkatka standard tauka kualiti servis perubat, industri perubat nengeri tu ulih dikelala sereta tebilang ba renggat antarabansa.
Iya madahka nya senipak enggau penumbuh pemansang industri sereta penyampau pemesai ti gawa dalam bidang perubat ke majak nambah.
“Nya alai komiti perubat lebih agi di Kuching patut deka bejalaika tanggungpengawa enggau besai agi awakka ulih tetapika peminta guna orang mayuh ti begunaka servis ke lebih engkeman.
“Aku arap bendar enti kitai nyendiaka servis perubat ti engkeman, kitai ulih nyadi palan servis perubat ti ulih matak orang ari menua bukai baka Kalimatan Barat enggau ke bukai datai berubat kitu jemah ila.
“Aku amat meransang nengah peluang enggau penumbuh pemansang (industri perubat) tu, di Kuching deka ulih nyadi palan perubat antarabansa lalu ukai semina ngangkatka industri dagang temuai,” ku iya.
Tun Taib mansutka pekara nya lebuh bejaku ba pengerami nasih tanah KPJ Kuching Specialist Hospital ti diatur ba palan baru endur ngaga KPJ Kuching Specialist Hospital ba Muara Tebas Land District ditu, kilah ensana.
Berebak enggau tu iya muji piak KPJ Healthcare Berhad ti bisi inisiatif ngaga baru palan KPJ Kuching Specialist Hospital pengudah 11 taun nyendiaka servis perubat di nengeri tu.
“Inisiatif KPJ tu chukup manah dikena napi peminta enggau guna di mengeri tu ti majak mayuh rayat ke ulih ngena servis ti disediaka piak peribit, trend tu deka majak nambah jemah ila.
“Nya alai kitai patut nyendiaka mayuh agi kereban perubat ti baru di Kuching dikena napi peminta guna orang mayuh sereta ngarapka teulihka servis ti mayuh pilih,” ku iya.
Kelimpah ari nya, Kepala Menteri Datuk Patinggi Tan Sri Adenan Satem madahka mengeri Kuching bisi tiga sepital peribit ti udah digaga sereta udah mantu pemansang industri perubat tauka pengerai di Sarawak.
Lalu diatu ku iya, KPJ Kuching Specialist Hospital mega ngemansangka bangunan baru enggau endur baru sepital ti muka ruang transformasi industri nya di nengeri tu.
Aku arap bendar kereban ti pemadu baru dikemansangka tu deka mai ngagai penyungkak kualiti servis ti dipejalaika raban pakar pengerai, lutur, indu misi enggau pengurusan KPJ ngagai semua kitai, ku iya.
KPJ Kuching kenyau ari ditumbuhka ku iya, udah ngemeratka bidang Pelancongan Kesihatan berindik ari pengawa ngelalu dipejalaika nyentuk ngagai menua luar lebih agi menua sepiak iya nya Indonesia enggau Brunei.
“Sesebuah sepitak ti ngemeran sereta ngemeratka sektor Pelancongan Kesihatan, patut ngenukuka kualiti servis ti disediaka amat bekualiti sereta nyulut.
“Semina sepital ti ulih nyendiaka servis ti pemadu manah aja ulih matak pesakit antarabansa ninggal ke menua asal sida enda lama laban deka berubat ba sepital nya.
“Kitai ngarapka nengah bangunan sepital baru nya ila. KPJ Kuching Specialist Hospital ulih matak lebih mayuh agi pesakit tauka temuai antarabansa berubat kitu, awakka ulih nyungkakka agi sektor ekonomi nengeri tu,” ku iya dalam jaku iya ti dibacha Menteri Muda Pengerai Mensia Mayuh Datuk Dr. Jerip Susil.
Kemari, Tun Taib nasih tanah ti pemesai 5 ekar endur ngaga bangunan baru KPJ Kuching Specilist Hospital ti bisi semilan (9) tingkat ti dipelabaka tembu dalam taun 2017.