SIBU: Penusah ketegal angus ditapi Sarimah Udin enggau Mazlan Hazemi di Kampung Bahagia Jaya, Teku ditu udah nerima penyiru ari raban Sarawak For Sarawakians (S4S) Sibu kena Hari Empat tu tadi.
S4S udah nyuaka bantu ngagai dua buah ruang bilik nya.
Pemeri mata duit nya disuaka ngagai seduai seraya dikemataka sida sebilik sereta raban aktivis S4S Sibu.
Nitih ku penyanding penemu S4S, pemeri nya udah diterima ari 48 iku raban aktivis S4S ti siru ari serata Sarawak.
Berebak enggau nya, lebuh dirandau, S4S ngarapka mayuh agi raban ari gempung ukai dikuasa perintah (NGO) ke bukai sereta pengari rayat ulih datai meri bantu ngagai raban orang ke tasah nya.
Ku iya, pemeri ti bansa nya ulih ngelempungka tating belanja ti ditapi sida.
“Nyadi peranak Sarawak ke ngembuan penyiru, endang nyadi tanggungpengawa kitai mantu orang bukai ti ditinggang penusah.
“Kitai mega ngarapka mayuh agi raban NGO ke bukai datai meri bantu ngagai raban orang tu,” ku iya.
Rumah Sarimah enggau Mazlan udah anggus dalam penusah anggus urung iay pukul 3 lemai kena 29 July tu kemari.
Kededua rumah seduai nya udah angus seratus peratus lalu ngujungka semua sida sebilik semina tinggal gari di punggung aja.
Kenu ku orang kena tinggang penusah nya, bisi tiga iku raban orang tuai umur sereta dua iku nembiak mit beumur 7- 8 taun diau di rumah rambau penusah tu nya lalu ke bukai benung gawa.
Piak S4S mega diterangka dia sida bisi penangul betelefon ngagai Raban Penyelamat enggau Pengenyah Penusah tauka BOMBA.
Kebuah pia laban sida semina nemu talian bebas tol 999 aja sereta sida nganti lama endur bantu nya datai.
Nya alai, piak S4S ngembuan penemu ngambika raban BOMBA patut ngelekatka pelekat Talian Kecemeasan nitihka endur ngambika ulih ngemuntangka mensia mayuh betelefon terus nuju BOMBA ti semak endur sida.