BERI AWAK NGAGAI PENGARI DAYAK: Nyabong bejaku ba mua mensia mayuh rambau program Bejalaika Licha diatur Opis Tanah enggau Servei begulai enggau pengempu tanah di Ulu Putai ke dukeruga pengawa ngaga tekat hidroelektrik Baleh diatur di Rumah Achan Inang, Sungai Amang empai lama ke udah.
Udah lama sitak nya dikuasa bansa bukai, beri mih awak ngagai chalun bansa Dayak maya PRN tu ila
KAPIT: Sekretari Politik Kepala Menteri, Wilson Nyabong Ijang minta semua pengundi di Konstituensi nya meri peluang ngagai chalun perintah Barisan Nasional (BN) ti deka bediri ngarika penuduk Pelagus maya pengawa bepilih nengeri (PRN)ti deka datai tu.
Kitai udah diarika chalun ke ukai bansa Dayak kenyau 20 taun ke udah, tu mih maya endur peranak menua tu meri peluang ngagai chalun BN ari bansa Dayak nyadi pengari di Pelagus ke tebal diuan bansa Dayak. Mayuh bansa Dayak ke bisi pemandai enggau pengelandik sereta profesyenal ti meretika peneka komuniti Dayak di Pelagus ngambika pemansang meruan diasaika peranak menua dia,” ku Nyabong.
Barang sapa ti nyadi chalun BN di Pelagus, rayat patut meri sukung penuh ngagai chalun nya kena nentuka BN menang,” ku Nyabung lebuh bejadika Program Bejalaika Licha diatur Opis Tanah enggau Servei begulai enggau raban orang ke madahka tanah sida di kandang menua Ulu Putai udah dikeruga pengawa ngaga tekad hidroelektrik Baleh diatur di Rumah Achan Inang, Sungai Amang apin lama ke udah.
Nimbal jaku ke dipansutka ex-Kaban Kunsil Nengeri (ADUN) Pelagus, Larry Sng Wei Shien ngagai raban media di menua tu ti nyalahka Menteri Kanan enggau Menteri Pemansang Tanah Sarawak, Tan Sri Datuk Amar Dr. James Jemut Masing ketegal enda mujur ngangkatka menua Merit bisi sitak kediri empu, ku Nyabong, Larry enda ingatka Masing udah milih iya mangku pengawa nyadi Menteri Muda ngambika ulih beratika sereta nyaga lalu ngintu pengelantang pendiau rayat di Pelagus.
Dalam pekara ke dibantaika Larry (Anang Bumai Ba Tanah Orang) iya nya penuduk Pelagus endang ungkup peranak Pelagus, Nyabong madah, pekara nya ukai isu ke besai laban semua kitai peranak Kapit.
“Dalam pengawa bepilih besai nengeri dulu suba, iya udah maduka George Lagong, asal penatai iya ari Baleh, bediri di Pelagus. Diatu pekara nya ukai nyadika isu. Iya tu nguji deka ngachau ngeregau runding peranak menua dikena matak undi dalam pengawa bepilih besai ti deka datai tu,” ku Nyabong manta.
“Pekara ke nyata iya nya Larry enda bejalaika pengawa iya enggau manah lebuh dipilih nyadi pengari sereta menteri muda laban iya nadai ngembuan langkar ekonomi. Iya semina ngasuh rayat bepanggai ba iya seiku aja,” ku Nyabong.
Orang ke meri licha dalam randau nya iya nya Welson Malian ti ngarika Superintendent Opis Tanah enggau Servei, Kapit, Peggy Runin.
Pengudah licha nya, awak pengawa tanya enggau saut bisi diatur kena meri peulang ngagai komuniti rumah panjai lebih agi ngagai raban orang ke ngempu tanah dikeruga raban piak kunteriktor tin gaga tekad hidroeletrik Baleh mantaika sebana sereta penusah sida bekaul enggau peminta sida ba pekara tanah nya.
Bela bisi datai ngulu program tu iya nya Tuan Kunsil, Robert Anyaw ti ngarika Pemesai Opis Pelilih Mit Kapit; Pemesai Pekara Lumba enggau Main Kapit, Jack Janda Pioh; Assistant Direktor Opis Orang Gawa Kapit, Khusyairy Pangkas; raban pengari ari mayuh bengkah opis perintah nyengkaum Opis Pengerara Api enggau Penyah Penusah, Opis Kunsil Pelilih Kapit, Opis Menteri Dagang Dalam Menua enggau Gerempung Kerejasama Kapit; Opis Pelajar, sekeda staff ari Opis Tanah enggau Servei nyengkaum Watson Awan, Pengulu Bunsu Gerinang, Pengulu Undi @ Mot Ak Bajai, Kaunsilor Bakat Gira enggau Jantai Maseng, lebih 12 iku raban ketuai ke datai ngelingi menua nya sereta bisi 200 iku peranak rumah panjai sereta raban orang ti dikangauka ngulu program nya.