Seiku indu asa dikeduan pedaja bejual pansuh keli

0

SIBU: Ulah pedaja ke nyual lauk ikan keli pansuh nyerumba Pengerami Main Asal Borneo (BDCF) 2015 chukup ngasaka ati seiku indu ke udah lebu ngandalka diri ulih nyepi penyamai lauk nya.

Seiku indu ke meli pansuh ba palan tu ngasaika diri balat dikeduan laban ruas berega RM10 nya semina ditepu sekerat iku ikan keli enggau kuah ke mayuh.

Iya madah diri meli lauk pansuh tu ba sebuah luntang Dayak ba palan BDCF ke diatur di Dataran Bandar Sibu, malam ensana.

“Patut buluh nya berat laban mayuh kuah. Kumbai kami bisi lima tau enam kerat dalam nya,” ku iya ke enggai dikelala nama madahka sebana ngagai  Utusan Borneo ditu kemari.

Iya madah, ulah pedaja ke nyual pemakai baka nya ngagai penguna semina deka ngulihka untung tang nadai ngerunding pangka iya ngagai pedaja bukai dudi hari.

“Dini patut semina nepu sekerat iku ikan dalam ruas ke ngemesai nya ke penuh laban kuah aja…?Patut kini nyual nya enggau rega RM10…?,” ku iya.

Iya ngarapka pekara nya enda nyadi agi ngagai penguna bukai.

“Taja penguna nadai meda penyampau isi dalam ruas, tang anang ngumbai chara baka tu ulih dikena ngiga untung,” ku iya.

Iya ngarapka pedaja ditu bejual mih enggau chara ke patut.

“Aku ngarapka udah tu nadai orang bukai dikeduan baka aku. Kitai meseti ngiga rejeki enggau chara ke menuku,” ku tandu iya.