Dikarang Jacqueline David//
KUCHING: Malaysia ulih nyadi sebuah menua ke pemadu tebilang enti semua pupu raban bansa sereta pengarap ulih bekerejasama sereta meruan bisi basa ke pangan diri.
Menteri Pengawa Dagang Temuai enggau Pengawa Berumah Datuk Amar Abang Johari Tun Openg madah rayat menua Sarawak nyadi teladan ke chukup manah, laban sida iya ulih begulai enggau pangan diri enggau likun sereta sama angkat mansang nadai ngira bansa enggau pengarap.
“Kami di Sarawak ulih diau enggau likun sereta mansang sama-sama enggau pupu bansa bukai ke bebida pengarap, sereta enda kala charut.
“Rayat Sarawak ke bemacham puu bansa nyadi chunto ke pengabis manah enti deka meda penyerakup,” ku Abang Johari.
Iya madah munyi nya ba lebuh bejaku ngepunka atur pengawa ‘Kuching International Forum on Unity’ (KIFU) di sebuah hotel entarabansa ditu, ensana.
Forum tu besai reti laban deka meri pemaik ngagai Yayasan 1Malaysia ke udah ngatur program nya.
“Baik nya Yayasan 1Malaysia ke ngaga ninting taun, dua taun sekali pasal forum tu, Perintah Nengeri deka meri kerejasama penuh laban kami orang Sarawak deka mandangka peneleba penyerakup rayat Sarawak nyadi chunto ke pengabis manah ke menua Malaysia.
“Malaysia ulih nyadi sebuah menua ke mujur enti semua pupu raban bansa sereta pengarap ulih bekerejasama, ulih begulai beserakup, bisi basa enggau pangan diri,” ku iya.
Abang Johari bechuntoka sebuah masjid enggau gerija di Lutong, Miri ke berimbai enggau pangan diri lalu seruran likun endur besembiang.
“Dua buah palan alai besembiang nya nyadi landskap ke beguna di Miri…Ninting Hari Lima, palan paking ba gerija nya penuh laban komuniti Islam paking lalu pia mega maya Hari Minggu, penuh laban komuniti Keristiin ke nurun besembiang.
“Nya alai ditu nadai penanggul bekaul enggau isu leka jaku Allah. Tu mandangka penegap kaul entara pupu pengarap di nengeri tu,” ku iya.
Dikena nyaga pengelikun ditu, Sarawak bisi undang-undang Immigresen iya empu lalu raban eksterimis enda dikemendar tama kitu.
Ngenang pengawa digaga Yayasan 1Malaysia, iya meri puji laban udah milih Kuching nyadi Mengeri Penyerakup.
“Di mengeri tu (Kuching) semua pengarap besai di dunya bisi ditu baka palan rumah sembiang iya nya masjid, gerija sereta tepikong digaga berimbai lalu ulih bebasaka pangan diri,” ku iya.
Sapit Chairman Kaunsil Penyanding Penemu Penyerakup Nasional sereta Kaban Kaunsil Direktor Yayasan 1Malaysia Tan Sri Lee Lam Thye madahka sida naka ulih beratika KIFU digaga nyadi seiti program ninting taun.
“Baka forum entarabansa ke diatur sehari tu kami chukup ngemeratka penyerakup.
“Nitihka udah disebut Dr Chandra Muzaffar, pekara penyerakup tu seiti pekara ti ditapi semua menua di dunya, ukai semina Malaysia aja,” ku iya.
KIFU ku iya engkeman diatur di Kuching laban kitai ditu mujur mandangka pendiau ke penuh penyerakup.
Sama datai Chairman Yayasan 1Malaysia Dr Chandra Muzaffar, Menteri Muda Perengka Guna Mensia Mayuh Datuk Dr. Stephen Rundi Utom, Menteri Muda Pengawa Dagang Temuai Datuk Talib Zulpilip enggau Sekretari Mendam Datu Ik Pahon Joyik.