KUCHING: Kaban Parlimen (MP) Mas Gading, Anthony Nogeh deka besumpah mangku pengawa nyadi sapit menteri ba mua Yang Di-Pertuan Agong sehari tu (Hari Dua) di Istana Negara, Kuala Lumpur.
Nogeh ke udah netapka pekara tu kemari madah, iya nerima surat dipadu mangku pengawa nyadi sapit menteri ari Menteri Besai Datuk Seri Najib Tun Razak, taja pan portfolio ke dipangku iya bedau dipadah.
“Aku beterima kasih ngagai Menteri Besai Datuk Seri Najib Tun Razak ke arapka aku mangku pengawa tu sereta ngagai parti laban udah nganjung nama aku,” ku iya madah lebuh dirandau kemari.
Iya madah, pengawa iya mangku pengawa nyadi sapit menteri, iya nya gawa ke rayat Malaysia tang deka mayuh agi beratika pemerat menua Sarawak.
“Padu pangku pengawa tu reti nya aku gawa ke Rayat Malaysia, tang aku deka beratika pemerat lebih agi mantu Sarawak ke dipasukka dalam kuasa pengawa opis menteri kami,” ku iya.
Presiden Parti Demokratik Progresif Sarawak (SPDP), Datuk Seri Tiong King Seng ti dipinta nimbal pangku pengawa Nogeh nya, madahka iya berasai temegah ati laban bisi wakil parti nya dalam kabinet perintah besai.
“Tu mandangka menteri besai nemu peneka semua parti komponen Barisan Nasional (BN). Padu pangku pengawa YB Nogeh tu mandangka semua komponen parti BN diatu bisi pengari dalam kabinet perintah besai,” ku Tiong ti mega MP Bintulu.
Kelimpah ari Tiong, ti mega nyadi ‘pengiring khas’ menteri besai ngagai menua Asia Timur sereta pangku pengawa nyadi sapit menteri, seiku agi MP ari SPDP (Baram) Anyie Ngau bisi diperita deka diberi pangku pengawa ke bisi bekaul enggau Perintah enda lama agi.
Ba pengawa ngubah pangku pengawa kabinet bedau lama tu tadi ti bisi dibantaika Najib Hari Dua tu tadi, SPDP sekali agi enda disengkaum dalam rintai kabinet perintah besai, dataika parti nya minta kaban parlimen sida iya diperundingka diberi pangku pengawa jemah ila.
Belandik ari nya, pangku pengawa Nogeh nyadi sapit menteri kabinet perintah besai, Sarawak ngembuan pengari ke tegap laban bisi lapan menteri penuh enggau empat sapit menteri.
Dalam rintai kabinet perintah besai sebedau tu, Sarawak bisi tujuh menteri penuh sereta empat sapit menteri.