MERUAN DIBASA: Jamit ngarika raban Peirntah Nengeri enggau Sapit Menteri Pemansang Menua Pesisir enggau Kandang Nengeri, Datuk Alexander Nanta Linggi meri basa ngagai niang rambau pengerami nya sentara raban ke bukai ngemataka pengawa nya.
KAPIT: Sekretari Politik Kepala Menteri Sarawak, Jefferson Jamit Unyat madahka Pengerami Ngintu Hari Bujang Berani nya hari ti besai reti ngagai peranak menua Malaysia dikena ngenang semua ex-soldadu ke udah gawa ngetanka menua tu.
“Sehari tu (31 Julai) kitai ngintu Hari Bujang Berani laban kitai deka meri basa ngagai raban soldadu sereta raban ke gawa ngetanka intergriti enggau kuasa merintah diri menua tu.
“Kitai meri tabi basa ngagai ex-soldadu ke udah gawa ngetanka menua tu ketegal pengawa sida sereta nyaup numbuhka pemansang Malaysia,” ku iya.
“Raban sida tu iya nya raban ex-Sarawak Ranger, Sarawak Iban Tracker, British Army, Malaysian Ranger sereta sekeda raban orang seiku-seiku iya ke udah ngetanka menua tu.
“Tikal ngagai kenang kitai rambau menua siga, penyelai ari menua Indonesia dalam taun 1960-an sereta udah nya menua dikeruga komunis.
“Sida (ex-soldadu) tu bejalaika pengawa ngetanka integrasyen enggau pengelikun menua. Raban nembika rebak baru ke ada dalam taun 1980-an dipelabaka enda nemu sejarah tu,” ku iya.
“Sehari tu hari kitai bebasaka ngagai raban orang ke nyaup pengawa numbuhka menua kitai tu kelebih agi ngagai raban ex-soldadu menua.
“Raban Dayak Iban ari Sitak Kapit raban ke pemadu mayuh nyereta Sarawak Ranger, Sarawak Tracker, British Army, Malaysian Ranger kenyau hari pun taun rambau nya suba sereta pun taun dalam Malaysia teulihka kuasa merintah diri dalam taun 1960-an ngagai 1980-an.
“Enti sema nadai pemerani enggau pengering raban sida tu ngelaban sereta ngetanka menua ari munsuh, kitai dipelabaka enda ngasaika penyenang enggau pengelantang baka ke sehari tu.
“Nya alai, kitai semua patut seruran ngingatka pemanah budi sida tu ke udah nyaup pengawa numbuhka Malaysia iya ke diatu,” ku Jamit bejaku lebuh Ngintu Pengerami Hari Bujang Berani kena pagi 31 Julai tu tadi diatur di Pendam Niang Tun Datuk Patinggi Jugah Barieng di pendam Methodist, Jalai Selirik ditu.
Jamit madahka niang Tun Jugah tu seiku ari raban Australian Regimen Special force 136 dalam taun 1940.
“Kira 75 taun ke udah dalam taun 1940-an, Jugah seiku ari raban Australian Regimen Special Force 136 iya nya soldadu langit ngena bilun engkabang enggau mega darat di Long Nawang, iya nya garis entara menua enggau Indonesia di Ulu Sungai Baleh.
“Juluk sida deka ngalahka soldadu Jipun. Ketegal pemerani enggau pemujur iya bejalaika pengawa nyadi ketuai, Jugah diberi basa nerima ‘King Medal For Courage In Cause Of Action’ ari Perintah British,” ku Jamit nikalka kenang iya.
“Jugah ukai semina nganyanka pemerani enggau pemujur iya nyadi ketuai rambau gawa soldadu penyelawai.
“Iya mega ngayanka diri Ketuai Dayak ke pemadu manah, tu udah dipandangka iya dalam pengawa nanga sempekat ‘Great Peace’ enyara Raban Bansa Dayak Iban enggau Orang Ulu dalam taun 1924 di Kubu Sylvia.
“Iya mega nyadi ketuai raban Pengulu di sepemanjai Sungai Rajang nyukung Sarawak, Sabah enggau Malaya numbuhka Malaysia sereta udah nya nyadi Menteri Pekara Khas Sarawak dalam Kabinet Perintah Besai dalam taun 1963.
“Beduduk ari jasa sereta pemanah pengawa iya nyaup numbuhka Negara bansa, Jugah udah diberi anugerah ti pemadu besai di Sarawak ti mai gelar ‘Datuk Patinggi’ sereta anugerah ari perintah Besai ke mai gelar ‘Tun’,” ku iya.
Iya madahka peranak Kapit raban ke pemadu mayuh nyadi ex-raban ranger enggau ketebal agi sida tu bejalaika servis di Malaya sentara iya ke bukai di Sarawak.
“Ketegal pemanah pengawa nyadi ketuai enggau pemerani sida tu ngelaban munsuh, sida tu udah nerima anugerah basa raban soldadu.
Niang Sarjan Ambau Gerasi ari Sarawak Ranger dalam taun 1960-an rambau operasyen ngatur penagwa nimbak raban komunis di Perak. Iya udah nerima pingat basa ‘Mention In Dispatch’.
“Bisi sekali lebuh bejalaika operasyen kampung di Perak, Ambau iya nya Sarawak Ranger dalam Soldadu British udah nimbak seiku rimau nyeliahka sereta nyelamatka raban sida iya bulih pemedis sereta bebadi ketagal rimau nya.
“Pengudah nya indu rimau tu tadi dianjung ngagai Zoo British di England. Raffle M 16 nya diatu dipandangka di Rumah Muzium Soldadu di Kuala Lumpur,” kenu ku peranang ari Chairman Malaysian Ex-Servicemen Association Pampang Kapit, Warrant Officer II (udah pinchin) Wilfred Billy Panyau.
“Niang Korporal Silo Janting ari Sarawak Ranger rambau pengawa nyereta operasyen ngelaban raban komunis di Pearak, Malaya, iya udah mujur munuh dua iku raban komunis.
“Kommander raban British udah nanya Silo iya nya; iya deka ke duit tauka midul, lalu Silo milih duit (penyampau duit nya nadai dipadah).
“Pengudah nya iya lalu dichirika nyadi Pengulu di Sitak Mujong, kandang menua Sungai Baleh,” ku Billy.
Sekeda ari sdia nerima anugerah soldadu ke pemadu tinggi iya nya ‘Sri Pahlawan Gagah Perkasa’ ari Malaysian Armed Forces.
“Pemesai Warrant II Lenggu China ari Battalion Keterubah Ranger Regimen Malaysia seiku ari raban sida tu.
Lieutenant Annuar Basha Khan ari Battalion Keterubah Ranger Regimen Malaysia nerima pingat/midul ‘Panglima Gagal Berani’.
Billy ke mega ex-raban ngetanka menua dalam taun 1960-an berasai sinu ati ketegal mayuh raban sama bela gawa enggau iya suba udah midang laban ke udah tuai umur.
Pia mega iya bisi berasai gaga ati ketegal agi mayuh ari sida ke udah manggai umur 70 ngagai 80 agi mengkang bisi diatu.
Iya madahka sida tu nyadika ikon ari ex-raban Sarawak Ranger, Sarawak Tracker, British Army iya ke madahka jerita sepanjai taun menua tu napi penusah ngelaban serang ari Indonesia enggau mega raban komunis.
Sida tu iya nya Lieftenant Kolonel Annuar Bahasa Khan, Kaptain Baharin, Sergeant Raja Angie sereta Korporal Unggek Antin, enggau raban ke bukai.
Sentara nya ngintu pengerami Hari Bujang Berani udah disereta tiga iku pemesai ari 9 Briged Infrantri Malaysia, Jalai Oya, Sibu iya nya Kaptain Muhammad Yuhyi Fahmi Yusoff, Pemesai Warrant II Matin Bilun sereta Bos Tuba, ngarika Residen Kapit iya nya Mandal Residen, Minggu Jampong, sereta raban ke bukai.
Bisi seratus iku ex-raban orang gawa ngetanka menua, kaban belayan, raban ketuai komuniti sereta mega raban orang seiku-seiku.
Reverend Pastor Bujang Enggik ngetuaika pengawa besembiang sentara Kapten Yuhyi ngarika raban soldadu, Jamit ngarika raban perintah sereta Minggu ngarika residen Kapit meri basa ngagai pendam Tun Jugah rambau ngintu pengerami nya.
Pemesai Warrant II Matin rambau nya mega bisi macha rintai nama sekeda Bujang Berani lalu nerangka reti ngintu Pengerami Hari Bujang Berani nya ti diatur di serata menua dikena ninggatka raban bujang berani tu.